Фалангалардан шикоят қилаётган ўзбекистонликлар, 5 яшар болани уриб кетган Matiz ҳайдовчиси, жазирамада навбатда турган абитуриентлар ва куннинг бошқа хабарлари

10 июлнинг эътиборга молик янгиликлари — «Дарё» дайжестида.

Навоий вилояти аҳолиси фаланга деб аталувчи ҳашаротлар кўпайганидан шикоят қилмоқда.

Аввалроқ Тошкент вилояти Бекобод туманидаги Жумабозор ҚФЙ атрофидаги дала ҳовлиларда фаланга (ўргимчаксимон заҳарли жонивор) пайдо бўлгани маълум қилинган эди. Қашқадарёнинг баъзи ҳудудлари аҳолиси ҳам фалангалардан шикоят қилган.

***

Тошкентда Matiz ҳайдовчиси 5 яшар болани уриб юборди.

ЙТҲ 9 июль куни соат 19.20 атрофида Сергели туманидаги Мирзо Турсунзода кўчасида рўй берган. 26 ёшли Баҳром Ҳ. Ўзининг Matiz автомобилида йўлни кесиб ўтаётган 5 ёшли Р.С.ни уриб юборган. Ҳайдовчи болани касалхонага етказган.

***

Абитуриентлар жазирама иссиқда турнақатор навбатда турмоқда.

Тарқалган суратларда Пайариқ тумани Давлат хизматлари марказидаги ҳолат акс этган.

Кейинроқ Самарқанд вилояти Пайариқ тумани Давлат хизматлари марказида ОТМларга ҳужжат топшириш учун келган абитуриентларнинг жазирамада навбатда турганига Давлат хизматлари агентлиги муносабат билдирди.

Таъкидланишича, ДХМларда навбат пайдо бўлиши сабабларидан бири — улар ҳозирча илгари мавжуд бўлган «Ягона дарча» марказлари биносида жойлашганидир. Аммо аввалги марказлардан фарқли ўлароқ, кўрсатилаётган хизматлар кўпайиб, ташриф буюрувчилар сони бир неча маротабага ошган.

Шунингдек, узоқ муддат навбатда туриш ва жазирама иссиқ туфайли айримлар ҳушидан кетган ва уларга тиббий ёрдам кўрсатилган.

***

Франция Гулнора Каримовага тегишли кўчмас мулкларни сотишдан тушган пулларни Ўзбекистонга қайтарадиган бўлди.

Франция ОАВ Гулнора Каримовага тегишли Париждаги квартирани 31 миллион еврога баҳоламоқда, вилла эса — 2,4 миллион евро, Версаль яқинидаги де Груссе қасри эса 28 миллион евро туради. Бироқ Ўзбекистон томони оладиган сумма сезиларли даражада кам.

***

Миллий гвардия ходими «Қўйлиқ» бозори ёнидаги кўприкдан ўзини ташламоқчи бўлган аёлнинг ҳаётини сақлаб қолди.

Суҳбат натижасида у 1992 йил 15 июнда Тошкент вилояти Нурафшон шаҳрида туғилган А.Б.эканлиги, турмуш ўртоғи Б.Э. билан оилавий жанжаллар сабабли жонига қасд қилмоқчи бўлганлиги маълум бўлди.