Сайланаётган маҳалла раисларининг қандай одамлигини олдиндан билиб бўлмайди, маҳалла раислари орасида учраётган иллатларни эса жамиятнинг бошқа бўғинларида ҳам учратиш мумкин. Бу ҳақда Фуқароларнинг ўзини-ўзи бошқариш органлари фаолиятини мувофиқлаштириш бўйича Республика кенгаши бошқарув раиси Шавкат Жавлонов 9 июль куни журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Мулоқот давомида маҳалла раислари орасида турли ҳуқуқбузарлик ва ҳатто жиноятчилик ҳолатлари қайд этилаётгани, бунга кенгаш раҳбариятининг муносабати қандай эканлиги ҳақида савол берилди.
«Маҳаллага бош қилиб сайланган раисларимизнинг ҳаммасида ҳам криминал ҳолатлар бўлмайди, деб кафолат беролмайман. Чунки бу ерда инсон омили бор. Маҳалла раислигига номзоднинг дастури билан танишсангиз, халқни ишонтириши, кўриниши ва гап-сўзини кузацангиз — туппа-тузук одам. Маълум вақт ўтгач эса унда ҳам ҳар хил иллатлар пайдо бўлиб қолади», — деди Жавлонов.
Унинг қўшимча қилишича, бу каби иллатлар фақат маҳалла тизимида эмас, бошқа соҳаларда ҳам кузатилмоқда.
«Бу нарса фақат маҳалла тизимида бўляпти, десак адолатсизлик бўлади. Бу билан ўзимизни оқлаб, бошқаларни қораламоқчи эмасман. Лекин бу жамиятимизнинг иллати. Шифокорларда, ўқитувчиларда, мактабгача таълимда ёки ҳуқуқни муҳофаза қилувчи идораларнинг ўзида — юқори бўғинидан тортиб, пастки тизимигача шундай иллат йўқми? Худога шукрки, бу иллат бутун жамиятимизни қамраб олмаган», — деди Жавлонов.
Қайд этишларича, 2018 йил маҳалла раисларини жиноий жавобгарликка тортиш билан боғлиқ 21 ҳолат қайд этилган.
Изоҳ (0)