Одессада жойлашган молиявий бўлимга бостириб кирган эркак у ердаги ишчиларни асирга олиб, уларни озод қилиш учун бир миллион доллар ҳамда вертолёт талаб қилди, деб хабар беради «Zakon.kz».
Одесса шаҳридаги молия бўлимига бостириб кирган эркак аввалига у ердаги ишчилардан пул талаб қилган. Қизлар берган пул етарли бўлмагач, жиноятчи ходимларга полицияга қўнғироқ қилиб, бир миллион доллар ва вертолёт сўрашни буюрган.
Вилоят полиция бошқармаси бошлиғи Олег Бех ўзини асирларга алмаштириш таклифини билдирган, бироқ босқинчи бунга рози бўлмасдан, ўз талабида қатъий туриб олган.
Уч соатга яқин давом этган музокаралардан сўнг, махсус бўлинма ходимлари бинога кириб, жиноятчини қўлга олишга муваффақ бўлган.
Ҳозирда босқинчига нисбатан тегишли моддалар билан жиноят иши қўзғатилгани айтилмоқда.
Изоҳ (0)