Адлия вазирлиги томонидан Telegram мессенжеридаги «Ҳуқуқий ахборот» ва «Правовая информация» каналларида «ОАВ ва Интернет тармоғида эълон қилинаётган маълумотларга қандай муносабатдасиз?» деган мавзуда ўтказилган сўровнома иштирокчиларининг 41 фоизи маълумотларни текшириб кўргач, уларга ишонишини билдирди.
«Дарё» мухбирининг хабар беришича, бу ҳақда Адлия вазирлиги бошқарма бошлиғи Фурқат Тожиев ОАВ ходимлари учун ўтказилган «Медиасаводхонлик ва fake news: ҳуқуқ ва масъулият чегараси» мавзусидаги семинарда айтиб ўтди.
«Фойдаланувчиларнинг 41 фоизи — 3490 нафар фойдаланувчи ‘Барча маълумотларни текшириб, сўнг уларга ишонаман’ деб жавоб берди. Респондентларнинг 31 фоизи эса берилаётган маъулмотларга ишонади ҳам, ишонмайди ҳам. 19 фоизи одатда ОАВ ва интернет хабарларига ишонади, лекин баъзида уларни текширади», — деди Тожиев.
Адлия вазирлиги вакилининг қайд этишича, баъзилар давлат органлари томонидан берилаётган ахборотга ишонмайди: «Бу муаммони расмий манбалар очиқлигини ошириш йўли билан ҳал қилиш мумкин. Давлат органлари фаолияти очиқлиги ва шаффофлигини таъминлаш зарур», — дея қўшимча қилди Фурқат Тожиев.
Изоҳ (0)