Adliya vazirligi: O‘zbekistonliklarning 41 foizi internetda tarqatilayotgan ma’lumotlarni tekshirib ko‘rishini bildirdi

Adliya vazirligi tomonidan Telegram messenjeridagi “Huquqiy axborot” va “Pravovaya informatsiya” kanallarida “OAV va Internet tarmog‘ida e’lon qilinayotgan ma’lumotlarga qanday munosabatdasiz?” degan mavzuda o‘tkazilgan so‘rovnoma ishtirokchilarining 41 foizi ma’lumotlarni tekshirib ko‘rgach, ularga ishonishini bildirdi.

“Daryo” muxbirining xabar berishicha, bu haqda Adliya vazirligi boshqarma boshlig‘i Furqat Tojiyev OAV xodimlari uchun o‘tkazilgan “Mediasavodxonlik va fake news: huquq va mas’uliyat chegarasi” mavzusidagi seminarda aytib o‘tdi.

“Foydalanuvchilarning 41 foizi — 3490 nafar foydalanuvchi ‘Barcha ma’lumotlarni tekshirib, so‘ng ularga ishonaman’ deb javob berdi. Respondentlarning 31 foizi esa berilayotgan ma’ulmotlarga ishonadi ham, ishonmaydi ham. 19 foizi odatda OAV va internet xabarlariga ishonadi, lekin ba’zida ularni tekshiradi”, — dedi Tojiyev.

Adliya vazirligi vakilining qayd etishicha, ba’zilar davlat organlari tomonidan berilayotgan axborotga ishonmaydi: “Bu muammoni rasmiy manbalar ochiqligini oshirish yo‘li bilan hal qilish mumkin. Davlat organlari faoliyati ochiqligi va shaffofligini ta’minlash zarur”, — deya qo‘shimcha qildi Furqat Tojiyev.