2019 йил июнь ойида Ўзбекистонда биринчи истеъмол бозоридаги товарлар ва хизматлар нархлари умумий даражасида пасайиш кузатилгани қайд этилди. Бу ҳақда Давлат статистика қўмитаси томонидан тақдим этилган маълумотларга таяниб, Spot хабар берди.
Мазкур ҳолат июнь ойида содир бўлган — нархларнинг ўртача даражаси пасайган ва дефляция (инфлацияга қарама-қарши жараён) 0,5 фоизни ташкил этган. Товарлар нархи ой давомида 0,8 фоизга, хусусан, озиқ-овқат товарлари — 1,8 фоизга тушган. Ноозиқ-овқат товарлари — 0,6 фоизга, хизматлар эса 0,7 фоизга ўсган.
2019 йилнинг январь—июнь ойлари оралиғида товар ва хизматлар нархида эса 5,6 фоизга ўсиш кузатилган. 2018 йилнинг шу даврига нисбатан нархларнинг ўртача даражаси 13,6 фоизга ўсган.
Июнь ойи давомида асосан помидор (57,2 фоиз) ва бодринг (52,1 фоиз) нархи тушган. Ундан кейинги ўринларни карам (36,3 фоиз), тарвуз (22,1 фоиз) ва қовун (10,7 фоиз) эгалламоқда. Пиёз, цитрус мевалар ва қизилчанинг нархида ўсиш содир бўлган.
Изоҳ (0)