23 июнь куни Қашқадарёда ички ишлар идораларида хизмат олиб бораётган ходимларнинг 60 нафарига янги уй берилди. Бу ҳақда «Дарё»га вилоят ИИБ матбуот хизмати хабар бермоқда.
Матбуот хизматига кўра, 5 қаватли 3 хонадан иборат, жами 60 хонадонни ўз ичига олган 2 та уй соҳиби ички ишлар органларининг алоҳида ўрнак кўрсатган, ҳуқуқбузарликларга қарши курашга салмоқли ҳисса қўшаётган ходимлар ҳисобланади.
ИИБ ходимларига берилган янги уй-жойларнинг дастлабки бадал тўлови вазирлик ташаббуси билан ходимларга қайтариш шарти билан беш йил муддатга берилган фоизсиз қарзлар эвазига қопланган.
– Эътиборлиси, мазкур уй-жойлар 7 фоизлик кредит асосида 15 йил муддатга берилмоқда, – дейди вилоят ички ишлар бошқармаси бошлиғининг ўринбосари, подполковник Шавкат Ҳайдаров. – Шунингдек, дастлабки бадал маблағлари учун вазирлик томонидан узоқ муддатли фоизсиз қарзлар берилгани ва бошқа имтиёзлар ҳам ходимларимизга жуда катта енгиллик яратди.
Қурилиш ишларига жами 6 миллиард 530 миллион сўмлик маблағ сарфланди.
Тадбирда сўз олган вилоят ҳокими Зафар Рўзиев янги уй соҳибларини қутлади.
–Уй-жойга эга бўлиш инсон ҳаётида энг муҳим воқеалардан бири ҳисобланади, – деди вилоят ҳокими ўз сўзида. – Афсуски, мамлакатимизда узоқ йиллар давомида давлат хизматчилари, шу жумладан, ички ишлар органлари ходимларини турар жой билан таъминлашга етарли даражада эътибор қаратилмади. Оқибатда зиммасида эл осойишталигини асрашдек масъулиятли вазифа турган соҳа ходимлари турли қийинчиликларга дуч келишарди. Энди эса уларга етарли даражада имконият яратилмоқда.
Изоҳ (0)