23-iyun kuni Qashqadaryoda ichki ishlar idoralarida xizmat olib borayotgan xodimlarning 60 nafariga yangi uy berildi. Bu haqda “Daryo”ga viloyat IIB matbuot xizmati xabar bermoqda.
Matbuot xizmatiga ko‘ra, 5 qavatli 3 xonadan iborat, jami 60 xonadonni o‘z ichiga olgan 2 ta uy sohibi ichki ishlar organlarining alohida o‘rnak ko‘rsatgan, huquqbuzarliklarga qarshi kurashga salmoqli hissa qo‘shayotgan xodimlar hisoblanadi.
IIB xodimlariga berilgan yangi uy-joylarning dastlabki badal to‘lovi vazirlik tashabbusi bilan xodimlarga qaytarish sharti bilan besh yil muddatga berilgan foizsiz qarzlar evaziga qoplangan.
– E’tiborlisi, mazkur uy-joylar 7 foizlik kredit asosida 15 yil muddatga berilmoqda, – deydi viloyat ichki ishlar boshqarmasi boshlig‘ining o‘rinbosari, podpolkovnik Shavkat Haydarov. – Shuningdek, dastlabki badal mablag‘lari uchun vazirlik tomonidan uzoq muddatli foizsiz qarzlar berilgani va boshqa imtiyozlar ham xodimlarimizga juda katta yengillik yaratdi.
Qurilish ishlariga jami 6 milliard 530 million so‘mlik mablag‘ sarflandi.
Tadbirda so‘z olgan viloyat hokimi Zafar Ro‘ziyev yangi uy sohiblarini qutladi.
–Uy-joyga ega bo‘lish inson hayotida eng muhim voqealardan biri hisoblanadi, – dedi viloyat hokimi o‘z so‘zida. – Afsuski, mamlakatimizda uzoq yillar davomida davlat xizmatchilari, shu jumladan, ichki ishlar organlari xodimlarini turar joy bilan ta’minlashga yetarli darajada e’tibor qaratilmadi. Oqibatda zimmasida el osoyishtaligini asrashdek mas’uliyatli vazifa turgan soha xodimlari turli qiyinchiliklarga duch kelishardi. Endi esa ularga yetarli darajada imkoniyat yaratilmoqda.
Izoh (0)