Эфиопия бош вазири Абий Аҳмад 23 июнь куни мамлакатда аҳоли сони бўйича иккинчи ўринда бўлган Амхара штатида тўнтариш ўтказишга уриниш содир бўлганини маълум қилди, деб хабар бермоқда «Лига Новости». Унинг айтишича, тўнтаришнинг олдини олишга эришилган.
Содир бўлган воқеа оқибатида Амхара ҳукумати раҳбари Амбахя Меконнен ва унинг маслаҳатчиси ҳалок бўлган. Кўп ўтмай Аддис-Абэбада Эфиопия армияси бош штаби раҳбари Сеаре Меконнен ўз қўриқчиси томонидан ўлдирилган. Ҳозирда қўриқчи ҳибсда сақланмоқда.
«Бу икки ҳужум бир бирига боғлиқдир. Ҳужумнинг кўпчилик иштирокчилари қўлга олинган, яна бир қатор шахслар қидирувга берилган», — деб таъкидлаган бош вазир матбуот котиби Нигуссу Тилахун.
Қайд этилишича, тўнтариш ташкиллаштириш бошида Амхара Хавсизлик хизмати раҳбари, армия генерали Асамниу Циге турган бўлиши мумкин. Циге 2018 йилгача тўққиз йилга қамалган бўлган. У, шунингдек, давлат тўнтариши режасини амалга оширишда гумон қилинган. Асамниу Циге ўтган йили амнистияга тушган бўлиб, қамоқдан озод этилган.
Тўнтариш ташкилотчиси деб гумон қилинаётган шахс қаердалиги ва у қўлга олинганми-йўқми маълум қилинмаган.
Изоҳ (0)