Россияда мева дўкони раҳбари нотаниш киши тушириб қолдирган 1 млн рублни эгасига қайтарди

Россияда Мева дўкони эгаси бўлган озарбойжонлик шахс кўчадан ичида 1 миллион рубль бўлган пакет топиб олди ва уни эгасига қайтарди, деб хабар бермоқда «Известия».

Маълум бўлишича, 28 ёшли Шамхал Гезалов дўсти билан банкка бормоқчи бўлган. Кредит ташкилотидан чиқаётганида нотаниш эркак пакет тушириб қолдирганига гувоҳ бўлган. Пакет эгаси буни сезмай, машинасига ўтириб кетиб қолган.

Гезалов пакетни олиб, ичида 1 миллион рубль борлигини кўрган. Унинг дўсти ўша заҳотиёқ топилма ҳақида ижтимоий тармоққа эълон берган. Ўзи эса пул эгасини қувиб етишга шошилган.

Озарбайжонлик эркак узоқ вақт пул эгасини қувиб ета олмаган, чунки у тўхташни хоҳламаган. Шунда Гезалов унга пакетни кўрсатган ва шундан сўнггина у тўхтайди. Пул эгаси бўлган иркуцлик шахс Шамхалга миннатдорчилик тариқасида пул бермоқчи бўлган, лекин у қабул қилмаган. Шундан сўнг унга қиммат коняк совға қилган.

Гезалов камтарона ҳаёт кечиришга ўргангани учун унинг дўсти бўлиб ўтган воқеани ижтимоий тармоққа жойлаган.