Ўзбекистонда тез тиббий ёрдам хизмати ҳайдовчилари томонидан 2017, 2018 йилларда ва 2019 йилнинг январь ойида жами 1 644 та йўл ҳаракати қоидалари бузилган ва бу рақамлар йилдан йилга ортиб бормоқда. Бу қоидабузарликлар аксарият ҳолларда беморлар мурожаати бўйича хизмат вазифасини бажараётган вақтда содир этилган, дея хабар беради ЎзА.
«Адолат» СДП фракцияси ва партия сиёсий кенгашининг ижроия қўмитаси ҳамкорлигида ташкил этилган йиғилишда шу масала кўтарилди.
Ўзбекистон «Адолат» СДП фракцияси аъзолари томонидан ишлаб чиқилган ва Қонунчилик палатасига киритилиши режалаштирилаётган «Ўзбекистон Республикасининг Маъмурий жавобгарлик тўғрисидаги кодексининг 171-моддасига қўшимча киритиш ҳақида»ги қонун лойиҳаси муҳокама қилинди.
Лойиҳа Олий Мажлис Қонунчилик палатаси депутатларининг Ўзбекистон Президентининг тавсияси асосида соғлиқни сақлаш тизими ва унинг ҳудудий бўлинмалари фаолиятини ўрганишнинг якуний хулосалари, мутахассислар билан олиб борилган амалий мулоқотлар, таҳлиллар асосида ишлаб чиқилган.
Тез тиббий ёрдам хизмати ходимлари кўмагига муҳтож беморлар учун ҳар бир дақиқа, ҳар бир сония ғанимат. Шунинг учун шифокорлар чақирув жойига вақтида етиб бориши шарт. Баъзи кечиктириб бўлмайдиган шошилинч ҳолатларда эса тез тиббий ёрдам ходимлари йўл ҳаракати қоидаларини бузишга мажбур бўлмоқда ва жавобгарликка тортилмоқда.
Таклиф этилаётган қонун лойиҳасининг қабул қилиниши тез тиббий ёрдам автомашиналарининг махсус автоматлаштирилган фото ва видео қайд этиш техника воситалари орқали аниқланган йўл ҳаракати қоидаларини бузиш билан боғлиқ амалиётдаги айрим муаммоли ҳолатлар бартараф этилишига хизмат қилади. Тез тиббий ёрдам хизмати кўрсатувчи транспорт воситалари ҳайдовчилари асоссиз юридик жавобгарлигининг олди олинади.
Изоҳ (0)