Собиқ бош прокурорга нисбатан очилган жиноий иш, Грузиядаги тартибсизликлар, Сенат мажлисида кўриб чиқилган масалалар ва куннинг бошқа хабарлари

21 июннинг эътиборга молик янгиликлари — «Дарё» дайжестида.

Ўзбекистон собиқ бош прокурори Отабек Муродовга нисбатан жиноий иш очилди.

Бу ҳақда Сенатдаги чиқишида Ўзбекистон Президенти Шавкат Мирзиёев маълум қилган. «Прокурорлар порахўр бўлса, ривожланиш бўлмайди. Нимага биз иккинчи Бош прокурорни жиноий жавобгарликка тортяпмиз? Отабек Муродовга нисбатан жиноий иш қўзғатилган. У вилоят прокурорларидан 100 минг, туман прокурорларидан 50 минг доллардан пора олган», — деди Президент.

***

Тбилисида россиялик депутатнинг парламентдаги чиқиши туфайли норозилик акциялари бошланди.

Грузия президенти Саломе Зурабишвили Москвани мамлакатдаги ҳолатни беқарорлаштиришда айблади.

Грузияда норозилик акцияларидан кейин парламент спикери истеъфога чиқди.

Мамлакатдаги норозилик намойишлари чоғида 300 дан ортиқ киши ҳибсга олинди.

***

21 июнь куни Тошкентда Олий Мажлис Сенатининг ялпи мажлиси очилди.

Президент Шавкат Мирзиёев Сенат раиси лавозимига Бош вазир ўринбосари — Ўзбекистон Хотин-қизлар қўмитаси раиси лавозимида ишлаб келган Танзила Норбоева номзодини тақдим этди.

Сенаторлар «Туризм тўғрисида»ги қонуннинг янги таҳририни маъқуллади.

Президент Сенат таркибида гендер тенглик масалалари бўйича қўмита ташкил этишни таклиф қилди.

Сенаторлар томонидан Навоий вилоятининг Навоий шаҳри ва Кармана тумани чегараларини ўзгартириш тўғрисидаги масала кўриб чиқилди. Кармана туманидаги 1 097,58 га ер Навоий шаҳри таркибига ўтказилади.

«Шахсга доир маълумотлар тўғрисида»ги қонун сенаторлар томонидан маъқулланди.

Ўзбекистонда қурол муомаласини тартибга солувчи қонун сенаторлар томонидан маъқулланди.

***

Ўзбекистондаги телешоу ташкилотчилари жиноий жавобгарликка тортилиши мумкин.

Қонунчилик палатасида 20 июнь куни «Миллий тикланиш» демократик партияси марказий кенгаши «Миллий ахборот маконида миллий манфаатлар: бугунги ҳолат ва истиқбол» мавзусида давра суҳбати ўтказилди.

«Борига барака», «Омад шоу», «Миллионер шоу», «Олтин калит» каби кўрсатувлар негизида меҳнат қилмасдан осон пул топиш, ўзгаларнинг ҳисобидан бир зумда бойиб кетиш каби чалғитувчи ғоялар борлиги тилга олинган.

***

Бухорода «Маданият» коллежини бузиш вақтида ер ости туннели топилди.

У Чорбакрга олиб борувчи Амир Олимхон туннели деб тахмин қилинмоқда.