Бухоро шаҳридаги Абу Али ибн Сино кўчаси йўли ёқасида жойлашган тадбиркор Фахриддин Турдиев раҳбарлигидаги «Регистон» МЧЖга қарашли 149-сонли Автомобилларга ёқилғи қуйиш шохобчасида 19 июнь куни соат 11:00 да ёнғин содир бўлган.
Фавқулодда вазиятлар вазирлиги Бухоро вилоят ЁХБ куч воситаларини бошқариш маркази гуруҳи бошлиғи, капитан Рустам Рўзиевнинг «Дарё»га маълум қилишича, ёнғин натижасида 3-сонли ёқилғи қуйиш колонкаси қисман, шахобча айвонининг 6 м2 майдонида пластик қопламаси ёнган. Ёнғиндан 332 м2 майдон сақлаб қолинган.
— Айни пайтда ёнғин сабаби ва моддий зарари аниқланмоқда. Суриштирув эса ўн кунгача давом этади. Суриштирув давомида аҳоли хонадонига етказилган моддий зарар аниқланиб, қийматини бозор нархида белгилаб берамиз. Агар АЁҚШ атрофи ёки яқинидаги корхонага зарар етказилган бўлса, Ўзбекистон Республикаси Вазирлар Маҳкамасининг 2010 йилдаги 13-сонли қарорига асосан, корхона томонидан комиссия тузилади. Корхонанинг ёнғин оқибатида қанча моддий зарар кўрганлиги уларнинг хулосасига кўра қопланади. Лекин мазкур ёнғин ҳолатида на аҳоли хонадони, на бирорта корхона талофат кўрган. Жароҳат олганлар ҳам йўқ, — деди Рустам Рўзиев.
Изоҳ (0)