Ўзбекистонда 2019 йил 20 июнда Бош вазир ўринбосари Танзила Норбоева раислигида Бола ҳуқуқлари тўғрисидаги конвенциянинг бажарилишини ташкил этиш масалалари бўйича идоралараро мувофиқлаштирувчи кенгаш йиғилиши ўтказилди. Бу ҳақда «Дарё»га UNICEF’нинг Ўзбекистондаги ваколатхонаси маълум қилди.
Мутахассислар мамлакатда ўтказилаётган ислоҳотлар жараёнида бола ҳуқуқларининг таъминланиши масалаларини ҳамда Бола ҳуқуқлари тўғрисидаги конвенциянинг 30 йиллигини нишонлаш режаларини муҳокама қилди.
«БМТнинг Бола ҳуқуқлари тўғрисидаги конвенцияси дунёда энг кўп давлатлар томонидан ратификация қилинган БМТ битими бўлиб, у бутун жаҳондаги болаларнинг ҳаётини яхшилашда муҳим аҳамият касб этади», — деди Танзила Норбоева.
«Мамлакатимизда бола ҳуқуқларини таъминлаш борасида қатор чора-тадбирлар амалга оширилди. Ўзбекистон Президенти Бола ҳуқуқлари кафолатларини янада кучайтиришга оид қўшимча чора-тадбирлар тўғрисида қарор қабул қилди», — деб таъкидлади у.
Бошқа масалалар билан бир қаторда, кенгаш аъзолари ота-она қарамоғидан маҳрум бўлган болаларнинг эҳтиёжларини қондиришга қаратилган беш йиллик ҳаракат режасини ишлаб чиқиш жараёнини муҳокама қилди.
«Ҳукумат ота-она қарамоғисиз қолган болалар учун оиладагидек муқобил шароитларни яратиш бўйича режалар ишлаб чиқаётганлиги қувонарли ҳолатдир. Оилаларни қўллаб-қувватлаш тизимини кучайтириш учун ота-она қарамоғидан маҳрум бўлган болаларнинг деинституциализацияси ҳамда улар учун оила кўринишидаги муқобил шароитларни яратиш бўйича ҳаракат режасини ишлаб чиқиш лозим. Бунинг учун болаларни катта муассасаларга жойлаш амалиётини ўзгартиришга, унинг ўрнига болаларни ўз оилаларидан ажратишнинг олдини олишга қаратилган маҳаллий ҳамжамият ташаббусларига эътибор қартиш лозим,» — деди UNICEF’нинг Ўзбекистондаги ваколатхонаси раҳбари Саша Грауманн.
Изоҳ (0)