Қозоғистон Қишлоқ хўжалиги вазирлиги мамлакатдан йирик шохли қорамоллар олиб кетилишини тақиқлмоқчи. «Курсив»нинг ёзишича, бу ҳақда вазирлик раҳбари Сапархан Омаров маълум қилган.
Унинг айтишича, 2018 йилда Қозоғистондан Ўзбекистонга 50 минг бош йирик шохли қорамол олиб кетилган. 2019 йилнинг 5 ойида эса 42 минг бош қорамол олиб кетилган.
«Бу бир томондан яхши. Демак, бизнинг чорвачилик дастуримиз яхши иш бермоқда. Одамларимиз кредитлар олиб мол боқиб, сотмоқда. Аммо бошқа томондан ўзимиз урғочи қорамоллар олиб келиш учун йирик миқдорда маблағ ажратяпмиз. Улар эса Ўзбекистонга олиб кетилмоқда», — деб таъкидлаган вазир.
Унинг сўзларига кўра, ўтган ҳафтада Ўзбекистон билан чегарада Қозоғистон чорва молларини етказиб берилишини назорат қилувчи икки гуруҳ ташкил қилинган.
«Текширувларнинг дастлабки натижаларига кўра, кўплаб қонун бузилиши қайд этилган. Мол қулоқларидан биркаларни кесиб олиш ҳолатлари кузатилган бўлиб, чорва моллар келиб чиқиши номаълум бўлиб қолмоқда. Ушбу текширув натижаларига кўра қарор чиқарамиз», — деб ваъда берган Сапархан Омаров.
Изоҳ (0)