Qozog‘iston Qishloq xo‘jaligi vazirligi mamlakatdan yirik shoxli qoramollar olib ketilishini taqiqlmoqchi. “Kursiv”ning yozishicha, bu haqda vazirlik rahbari Saparxan Omarov ma’lum qilgan.
Uning aytishicha, 2018-yilda Qozog‘istondan O‘zbekistonga 50 ming bosh yirik shoxli qoramol olib ketilgan. 2019-yilning 5 oyida esa 42 ming bosh qoramol olib ketilgan.
“Bu bir tomondan yaxshi. Demak, bizning chorvachilik dasturimiz yaxshi ish bermoqda. Odamlarimiz kreditlar olib mol boqib, sotmoqda. Ammo boshqa tomondan o‘zimiz urg‘ochi qoramollar olib kelish uchun yirik miqdorda mablag‘ ajratyapmiz. Ular esa O‘zbekistonga olib ketilmoqda”, — deb ta’kidlagan vazir.
Uning so‘zlariga ko‘ra, o‘tgan haftada O‘zbekiston bilan chegarada Qozog‘iston chorva mollarini yetkazib berilishini nazorat qiluvchi ikki guruh tashkil qilingan.
“Tekshiruvlarning dastlabki natijalariga ko‘ra, ko‘plab qonun buzilishi qayd etilgan. Mol quloqlaridan birkalarni kesib olish holatlari kuzatilgan bo‘lib, chorva mollar kelib chiqishi noma’lum bo‘lib qolmoqda. Ushbu tekshiruv natijalariga ko‘ra qaror chiqaramiz”, — deb va’da bergan Saparxan Omarov.
Izoh (0)