Forbes Россиядаги энг йирик ер эгалари рейтингини тузди. Биринчи ўринни собиқ қишлоқ хўжалиги вазирининг оиласи эгаллади

Forbes Россиядаги энг қиммат қишлоқ хўжалиги ер майдонлари эгалари рейтингини тузди. Бу ҳақда Meduza хабар бермоқда.

Мазкур рейтингдаги биринчи ўринни собиқ қишлоқ хўжалиги вазири ва Краснодар ўлкаси губернатори Александр Ткачёвнинг оиласи эгаллади. Н. Ткачёв номидаги агрокомплекс 68, 5 миллиард рубль баҳоланадиган 649 минг гектар ерга эгалик қилади.

Россиядаги иккинчи энг йирик ер эгаси Владимир Евтушенковнинг «Система» компаниясига қарашли «Степь» агрохолдинги ҳисобланади. Агрохолдинг ихтиёрида қиймати 45,6 миллиард рублга тенг 412 минг гектар ер мавжуд.

Рейтингдаги учинчи ўринни ака-ука Александр ва Виктор Линниковга тегишли «Мираторг» компанияси эгаллади. Компаниянинг 45 миллиард рубль баҳоланадиган 1 миллион гектар ери бор. «Мираторг» эгалик қиладиган ерлар Россиядаги ҳудуд жиҳатидан энг катта, бироқ энг қиммат бўлмаган майдонлар ҳисобланади.

Нашрга кўра, Россиядаги 20 та энг йирик ер эгаси назорати остидаги майдонларнинг умумий қиймати 471,7 миллиард рублга тенг.