Forbes Rossiyadagi eng yirik yer egalari reytingini tuzdi. Birinchi o‘rinni sobiq qishloq xo‘jaligi vazirining oilasi egalladi

Forbes Rossiyadagi eng qimmat qishloq xo‘jaligi yer maydonlari egalari reytingini tuzdi. Bu haqda Meduza xabar bermoqda.

Mazkur reytingdagi birinchi o‘rinni sobiq qishloq xo‘jaligi vaziri va Krasnodar o‘lkasi gubernatori Aleksandr Tkachyovning oilasi egalladi. N. Tkachyov nomidagi agrokompleks 68, 5 milliard rubl baholanadigan 649 ming gektar yerga egalik qiladi.

Rossiyadagi ikkinchi eng yirik yer egasi Vladimir Yevtushenkovning “Sistema” kompaniyasiga qarashli “Step” agroxoldingi hisoblanadi. Agroxolding ixtiyorida qiymati 45,6 milliard rublga teng 412 ming gektar yer mavjud.

Reytingdagi uchinchi o‘rinni aka-uka Aleksandr va Viktor Linnikovga tegishli “Miratorg” kompaniyasi egalladi. Kompaniyaning 45 milliard rubl baholanadigan 1 million gektar yeri bor. “Miratorg” egalik qiladigan yerlar Rossiyadagi hudud jihatidan eng katta, biroq eng qimmat bo‘lmagan maydonlar hisoblanadi.

Nashrga ko‘ra, Rossiyadagi 20 ta eng yirik yer egasi nazorati ostidagi maydonlarning umumiy qiymati 471,7 milliard rublga teng.