19 июнда Ўзбекистонда Бангладеш Халқ Республикаси президенти бошчилигидаги делегацияни кузатиш маросими бўлиб ўтди. Бу ҳақда Бош вазир ўринбосари Азиз Абдуҳакимовнинг Facebook’даги саҳифасида маълум қилинди.
Юқори мартабали меҳмон Ўзбекистонга ташрифдан катта таассуротлар билан қайтаётганини, ўзбек халқининг бутун дунёга донғи таралган меҳмондорчилигига шахсан гувоҳ бўлганини таъкидлади.
«Ўзбекистонда ўтказган ажойиб кунларим хотирамда абадий муҳрланиб қолади. Ўзбекистон Президенти Шавкат Мирзиёев ҳамда бутун ўзбек халқига кўрсатилган самимий қабул учун миннатдорчилик билдираман», - деди Бангладеш президенти.
Таъкидлаш жоики, Бангладеш Халқ Республикаси президенти Абдул Ҳамид Самарқандга ташрифи давомида Имом Ал-Бухорий мажмуасида бўлиб, бутун ислом олами Бухорийни яхши билиши ва уни юксак қадрлашини таъкидлади. президент Абдул Ҳамид мазкур мажмуа қурилиши тарихи ҳамда унинг ҳаёти ва фаолиятига оид маълумотларни катта қизиқиш билан тинглади.
Бангладеш раҳбари Имом Ал-Бухорий каби ислом цивилизациясининг буюк вакилларини хотирлашда муқаддас қадамжоларни зиёрат қилиш жуда муҳим эканини қайд этди. Шу ўринда Ўзбекистон ва Бангладеш ўртасидаги мунтазам йўловчи рейсларни қайта тиклаш масаласи муҳокама қилинганини маълум қилди.
«Таъкидлаш лозимки, биз Ўзбекистон Республикаси Президенти билан мамлакатларимиз ўртасидаги мунтазам йўловчи рейсларини қайта тиклаш масаласини муҳокама қилдик. Менинг фикримча, бу ўзаро сайёҳлар алмашинуви, жумладан, зиёрат туризми бўйича алоқаларни ривожлантириш учун туртки бўлиб хизмат қилади», - деди Абдул Ҳамид.
Юқори мартабали меҳмон Имом Ал-Бухорий мажмуасини зиёрат қилишдек бахтга мушарраф бўлганидан бахтиёр эканини таъкидлади.
«Бангладешда яшовчи ҳар бир мусулмон бу масканда бўлишни орзу қилади. Афсуски, ҳамма ҳам бундай имкониятга эга эмас», - деди у.
Абдул Ҳамид мажмуанинг илмий-тадқиқот экспонатлари билан яқиндан танишиб чиқди. У лойиҳа муаллифи Ўзбекистон Президенти Шавкат Мирзиёев эканини билгач, давлат раҳбарининг бу иши катта эҳтиромга лойиқ эканини алоҳида таъкидлади ва Президентнинг бу каби ташаббусларини юқори баҳолади.
Президент Абдул Ҳамид Имом Ал-Бухорийнинг илм истагида амалга оширган саёҳатлари географияси унда катта таассурот қолдирганини айтди.
«Бангладеш халқи бу масканни зиёрат қилишдан беҳад шод бўлади. Ўзбекистон ҳукуматига Ислом оламининг шундай муқаддас қадамжоларини зиёрат қилиш учун тақдим этган имконияти ва кўрсатган эҳтироми учун чуқур миннатдорчилик билдираман», - деди у.
Президент Абдул Ҳамид Имом Ал-Бухорий мажмуасида Қурон тиловат қилди.
Зиёрат сўнггида томонлар ўзаро совғалар билан алмашди.
Изоҳ (0)