Евроиттифоқ Марказий Осиё мамлакатлари билан муносабатларни янги босқичга олиб чиқиш ниятида. 17 июнь куни Брюссель тасдиқлаган янги стратегияда айни мақсад ўз аксини топган.
Янги стратегия ёрдамида Брюссель Ўзбекистон, Қозоғистон, Қирғизистон, Тожикистон ва Туркманистон билан «янада кучли, замонавий ва ноэксклюзив ҳамкорлик»ни ўрнатишни режалаштирмоқда. ЕИнинг Марказий Осиё мамлакатлари билан шериклик ва ҳамкорлиги тўғрисидаги янги битимлари Қозоғистон ва Қирғизистон кирган Евроосиё иқтисодий иттифоқи (ЕОИИ) каби интеграцион ташаббусларга мос келади.
Марказий Осиё мамлакатлари бўйича олдинги стратегия 2007 йилда қабул қилинган бўлиб, Еврокомиссия расмий вакили Майя Косьянчичнинг изоҳлашича, ўтган вақт давомида вазият жиддий ўзгарган, янги ҳужжат «бугунги хатарлар ва муносабатлар ҳолатига мос келади.»
Евроиттифоқ киберхавфсизлик ва гибрид таҳдидларни аниқлаш бўйича ўз тажрибалари билан ўртоқлашишга тайёр. Брюссель, шунингдек, радикализацияга қарши курашишда жинслар ўртасидаги тенглик тамойиллари ва аёллар ролини кучайтиришни илгари суришни мўлжалламоқда.
Янги стратегия бандларидан бири Марказий Осиё мамлакатларининг Афғонистон билан ҳамкорлигини ривожлантиришни кўзда тутади. Еврокомиссия Кобулнинг минтақа давлатлари дастурлари ва лойиҳаларида иштирок этиши Афғонистонда вазиятнинг барқарорлашувига олиб келади, деб умид қилмоқда.
Янги стратегия Марказий Осиё мамлакатлари ўртасида минтақавий ҳамкорликни ривожлантиришга хизмат қилиши лозим. Шу муносабат билан ҳужжатда 2018 йил март ойида Нур-Султонда ўтказилган минтақа давлатлари етакчиларининг норасмий саммити эслатилади. Таъкидланишича, ушбу учрашув «минтақавий ҳамкорликнинг янги импульси бўлган.
Брюсселнинг таъкидлашича, Марказий Осиё мамлакатлари минтақавий ҳамкорлик шакллари ва суръатларини ўзлари танлайди, Евроиттифоқ эса бу жараёнларни ўз тажрибалари асосида фақат қўллаб-қувватлайди.
Янги стратегия мазмунида учта энг муҳим жиҳати мавжуд. Биринчиси, минтақада барқарорликни мустаҳкамлаш. Бу энг аввало хавфсизлик, коррупцияга қарши кураш, ислоҳотлар, инсон ҳуқуқлари ва демократияни ривожлантиришни кўзда тутади. Иккинчиси, иқтисодиётни ривожлантириш. Учинчиси, сиёсий мулоқотларни фаоллаштириш.
Янги стратегия Марказий Осиёда хусусий секторлар, инвестиция муҳитини яхшилаш, «яшил» ва чиқиндисиз иқтисодиётга ўтишни тезлаштириш бўйича ҳам аниқ ташаббусларни ўз ичига олган. Хусусан, Еврокомиссия минтақа мамлакатларида Европа савдо палаталарини ташкил этиш орқали Марказий Осиёда кичик ва ўрта бизнесни ривожлантиришга ёрдам беришни режалаштирмоқда.
Шунингдек, Брюссель янги стратегия доирасида Марказий Осиё мамлакатларини Жаҳон савдо ташкилотига киришига ёрдам беришни ҳам ваъда қилмоқда.
Изоҳ (0)