Yevroittifoq Markaziy Osiyo mamlakatlari bilan munosabatlarni yangi bosqichga olib chiqish niyatida. 17-iyun kuni Bryussel tasdiqlagan yangi strategiyada ayni maqsad o‘z aksini topgan.
Yangi strategiya yordamida Bryussel O‘zbekiston, Qozog‘iston, Qirg‘iziston, Tojikiston va Turkmaniston bilan “yanada kuchli, zamonaviy va noeksklyuziv hamkorlik”ni o‘rnatishni rejalashtirmoqda. YeIning Markaziy Osiyo mamlakatlari bilan sheriklik va hamkorligi to‘g‘risidagi yangi bitimlari Qozog‘iston va Qirg‘iziston kirgan Yevroosiyo iqtisodiy ittifoqi (YeOII) kabi integratsion tashabbuslarga mos keladi.
Markaziy Osiyo mamlakatlari bo‘yicha oldingi strategiya 2007-yilda qabul qilingan bo‘lib, Yevrokomissiya rasmiy vakili Mayya Kosyanchichning izohlashicha, o‘tgan vaqt davomida vaziyat jiddiy o‘zgargan, yangi hujjat “bugungi xatarlar va munosabatlar holatiga mos keladi.”
Yevroittifoq kiberxavfsizlik va gibrid tahdidlarni aniqlash bo‘yicha o‘z tajribalari bilan o‘rtoqlashishga tayyor. Bryussel, shuningdek, radikalizatsiyaga qarshi kurashishda jinslar o‘rtasidagi tenglik tamoyillari va ayollar rolini kuchaytirishni ilgari surishni mo‘ljallamoqda.
Yangi strategiya bandlaridan biri Markaziy Osiyo mamlakatlarining Afg‘oniston bilan hamkorligini rivojlantirishni ko‘zda tutadi. Yevrokomissiya Kobulning mintaqa davlatlari dasturlari va loyihalarida ishtirok etishi Afg‘onistonda vaziyatning barqarorlashuviga olib keladi, deb umid qilmoqda.
Yangi strategiya Markaziy Osiyo mamlakatlari o‘rtasida mintaqaviy hamkorlikni rivojlantirishga xizmat qilishi lozim. Shu munosabat bilan hujjatda 2018-yil mart oyida Nur-Sultonda o‘tkazilgan mintaqa davlatlari yetakchilarining norasmiy sammiti eslatiladi. Ta’kidlanishicha, ushbu uchrashuv “mintaqaviy hamkorlikning yangi impulsi bo‘lgan.
Bryusselning ta’kidlashicha, Markaziy Osiyo mamlakatlari mintaqaviy hamkorlik shakllari va sur’atlarini o‘zlari tanlaydi, Yevroittifoq esa bu jarayonlarni o‘z tajribalari asosida faqat qo‘llab-quvvatlaydi.
Yangi strategiya mazmunida uchta eng muhim jihati mavjud. Birinchisi, mintaqada barqarorlikni mustahkamlash. Bu eng avvalo xavfsizlik, korrupsiyaga qarshi kurash, islohotlar, inson huquqlari va demokratiyani rivojlantirishni ko‘zda tutadi. Ikkinchisi, iqtisodiyotni rivojlantirish. Uchinchisi, siyosiy muloqotlarni faollashtirish.
Yangi strategiya Markaziy Osiyoda xususiy sektorlar, investitsiya muhitini yaxshilash, “yashil” va chiqindisiz iqtisodiyotga o‘tishni tezlashtirish bo‘yicha ham aniq tashabbuslarni o‘z ichiga olgan. Xususan, Yevrokomissiya mintaqa mamlakatlarida Yevropa savdo palatalarini tashkil etish orqali Markaziy Osiyoda kichik va o‘rta biznesni rivojlantirishga yordam berishni rejalashtirmoqda.
Shuningdek, Bryussel yangi strategiya doirasida Markaziy Osiyo mamlakatlarini Jahon savdo tashkilotiga kirishiga yordam berishni ham va’da qilmoqda.
Izoh (0)