Халқ таълими вазири 2030 йилгача бўлган вазирликнинг режалари ҳақида маълумот берди

Халқ таълими вазири Шерзод Шерматов «Дарё»га эксклюзив интервью берди. Вазир мажбурий мактаб формаси, ўқув дарсликларининг етишмаслиги, китоблар сифати ҳамда айрим мактабларда дарслар уч сменада ўтилиши ҳақида гапирди.

Шерзод Шерматовга кўра, Таълим вазирлигининг бир йил ичида эришган энг ютуғи жамиятда ўқитувчига муносабат ўзгаргани.

Бир йилда бутун жамиятда мактаб ва ўқитувчи деган масалалар трендга айланди. Мактабларга ёрдам бериш кераклиги ўзига яраша умуммиллий ҳаракатга айланмоқда. Шу энг катта натижа ва ютуғимиз деб айтсак бўлади.

Шерзод Шерматов мажбурий мактаб формаси ҳақида алоҳида тўхталиб, форма тўғрисида Ҳукумат тегишли қарори қабул қилиниши, ҳамда мактаб формаси келаётган ўқув йилида мажбурий бўлмаслиги ҳақида маълум қилди.

Формани жуда кўп муҳокома қилса бўлади. Ижобий томонини ҳам, салбий томонини ҳам. Лекин, шошилиш керак эмас. Бизда озгина шошиш бўлаяпти. Мактаб формаси ўтган йили мажбурий эмас, ихтиёрий бўлди. Янги ўқув йилида мажбурий қилсак, шошилиш бўлиб қолади.

Шерзод Шерматов мактаблардаги текшир-текширлар назорати Президент қарори билан прокуратурага юклатилганидан сўнг, уларни кескин камайтиришга эришилгани ҳақида ҳам айтди.

Текширишлар йигирма бараваргача камайди. Сабаби Президентдан қатъий топшириқ бўлди. Умумий назорат прокуратурага юклатилди. Яқинда янги тартиб жорий қилиниб, алоҳида қарор чиқди. Мактабларда текширувларни тартибга солиш ҳақида.

Шунингдек, вазир мактаб микроҳудудида яшайдиган, лекин ўзининг мактабига кира олмайдиган болалар бошқа мактабларда ўқишга мажбур бўлиб келаётгани, уларнинг ўрнига эса бошқа микроҳудудлардан таниш-билиш ҳамда пора билан қабул қилинган ўқувчилар ҳақида ҳам тўхталиб ўтди.

Бола ўзининг микроҳудудидаги мактабга таниш-билишсиз, бепул кира олади. Бола микроҳудуддан қамраб олинмасдан қолмайди. Аввал шу мактаблар микроҳудуди тўлиқ қамраб олинади, ундан кейин агар жой қолса қўшимча квота бўйича бола олиш мумкин бўлади. Янги тизим айнан болалар қулайлик яратади.

Бундан ташқари, вазир электрон кундалик ва журналларнинг синови ҳақида, уларни киритиш билан боғлиқ муаммолар, олдиндаги катта режалар ва 2030 йилгача бўлган вазирликнинг режалари ҳақида айтиб берди.

https://www.youtube.com/watch?v=ERl3IPN9l30