Ўзбекистонда ёзнинг иссиқ кунларида автомобилда қуёшдан сақланган ҳолда юриш учун 20 миллион сўмдан ортиқ харажат қилиш лозим. Орамизда 5-10 йиллаб ишлаб ҳам шунча пул орттириб, йиға олмайдиганлар бор. Демак, улар ўз автомобилида «комфорт» яратишга қодир эмас. Бу ҳақда ЎзА мухбири Анора Содиқова фикр юритган.
Ўзбекистонда 8-9 ой қуёш чарақлаб, ёз чилласи одамни беҳузур қилади. Аксарият автомобиль ҳайдовчиларининг бир қўли офтобда куйганидан ҳам ажратиб олиш мумкин. Яна бунинг устига, тиббиёт ходимлари қуёшнинг ультрабинафша нурлари тери саратони касалига олиб келишидан огоҳлантиради. Шундай экан, автомобиль ойналарини қорайтириш фақат пулдорлар имконияти етадиган қулайликка айлантирилгани қанчалик тўғри?
Бу ҳақда Халқ депутатлари Чилонзор тумани кенгаши депутати Умид Санақулов фикр билдирди:
— Машина ойналари «тонировка»си ўртача маош олиб ишлайдиганлар учун жуда қиммат. Бироқ, автомобиль ойналарини қуёшдан сақланиш учун қорайтириш бизнинг иқлим шароитимизда жуда зарур. Жамиятнинг маълум қатламигина қуёшдан сақланиб, салқин юра олади. Менимча, бу барча фуқаролар имконияти даражасида бўлиши керак. Агар Ўзбекистонда 1-2 миллион автомобиль бўлса, уларнинг 0,1 фоизи ҳам «тонировка» қилдирмаган. Машина ойналарини қорайтириш нархи энг кам иш ҳақининг 10 бараварига камайтирилса, «тонировка» қилувчилар ҳам кўпаяди. Ўз-ўзидан бюджетга тушум ҳам ортади.
Айни пайтда тўловлар қимматлиги сабаб кўпчилик ундан фойдаланмаяпти. Хоҳловчиларни эса нарх қимматлиги қийнамоқда. Ҳужжатсиз машинаси ён ойналарини «тонировка» қилаётганлар ҳам анчагина. Қарорлар билан одамларни қийнаш керак эмас. Аксинча, қарорлар халқ фаровонлигига хизмат қилиши лозим.
Маълумотларга кўра, жорий йилнинг беш ойи давомида рухсатномасиз машина ён ойналарини қорайтирган ва пардалар билан ёпган 1072 нафар ҳайдовчига нисбатан маъмурий баённома тузилиб, чора кўрилган. Рухсатномасиз машина ойналарини қорайтириш энг кам иш ҳақининг 25 баробари миқдоридаги жарима билан жазоланади.
Ҳозиргача 400 га яқин автомобиль эгаси рухсатнома асосида тўловларни бажариб, «тонировка» қилдирган.
Изоҳ (0)