«Илҳом» театри асосчиси Марк Вайлнинг қотили Ўзбекистонга қайтарилди. Бу ҳақда Ўзбекистон Бош прокуратураси матбуот хизмати «Дарё» га маълум қилди.
«2019 йилнинг 12 февралида Ўзбекистон Бош прокуратураси томонидан Тожикистон Бош прокуратураси сўрови бўйича жазо муддатини ўтаётган Ёқуб Ғафуров Тожикистон ҳудудида икки ва ундан ортиқ кишини қасддан ўлдириш, ўқотар қуролларни ноқонуний сақлаш, безорилик ва давлат мансабдор шахсларига нисбатан зўравонлик ишлатиш сингари жиноятларни содир этганлиги учун жиноий жавобгарликка тортиш мақсадида уч ой муддатга қўшни давлат ваколатли органлари қўлига топширилган эди.
2019 йил 7 май куни Ёқуб Ғафуров Тожикистоннинг ваколатли органлари томонидан Ўзбекистонга қайтарилган.
Ҳозирда у Ўзбекистон ҳудудида содир этган жиноятлари учун ўзига берилган жазо муддатини ўташда давом этмоқда», — дейилади Бош прокуратура хабарида.
Маълумот учун, 2010 йил 17 февраль куни жиноят ишлари бўйича Тошкент шаҳар суди Ёқуб Ғафуровни Ўзбекистон ҳудудида бир қатор жиноятларни содир этганликда айбдор деб топиб, 20 йил муддатга озодликдан маҳрум этган эди. Жумладан, Ёқуб Ғафуров шериклари Алишер Сатторов ва Қаҳрамон Пўлатов билан «Илҳом» театри асосчиси Марк Вайлнинг ўлимида айбдор деб топилган.
Марк Вайль 2007 йил 6 сентябрда ўлдирилганди. Унга уйининг подездида ҳужум қилинган. Оғир тан жароҳатларини олган 55 ёшли Марк Вайль шифохонада вафот этган.
Изоҳ (0)