“Ilhom” teatri asoschisi Mark Vaylning qotili O‘zbekistonga qaytarildi. Bu haqda O‘zbekiston Bosh prokuraturasi matbuot xizmati “Daryo”ga xabar berdi.
“2019-yilning 12-fevralida O‘zbekiston Bosh prokuraturasi tomonidan Tojikiston Bosh prokuraturasi so‘rovi bo‘yicha jazo muddatini o‘tayotgan Yoqub G‘afurov Tojikiston hududida ikki va undan ortiq kishini qasddan o‘ldirish, o‘qotar qurollarni noqonuniy saqlash, bezorilik va davlat mansabdor shaxslariga nisbatan zo‘ravonlik ishlatish singari jinoyatlarni sodir etganligi uchun jinoiy javobgarlikka tortish maqsadida uch oy muddatga qo‘shni davlat vakolatli organlari qo‘liga topshirilgan edi.
2019-yil 7-may kuni Yoqub G‘afurov Tojikistonning vakolatli organlari tomonidan O‘zbekistonga qaytarilgan.
Hozirda u O‘zbekiston hududida sodir etgan jinoyatlari uchun o‘ziga berilgan jazo muddatini o‘tashda davom etmoqda”, — deyiladi Bosh prokuratura xabarida.
Ma’lumot uchun, 2010-yil 17-fevral kuni jinoyat ishlari bo‘yicha Toshkent shahar sudi Yoqub G‘afurovni O‘zbekiston hududida bir qator jinoyatlarni sodir etganlikda aybdor deb topib, 20 yil muddatga ozodlikdan mahrum etgan edi. Jumladan, Yoqub G‘afurov sheriklari Alisher Sattorov va Qahramon Po‘latov bilan “Ilhom” teatri asoschisi Mark Vaylning o‘limida aybdor deb topilgan.
Mark Vayl 2007-yil 6-sentabrda o‘ldirilgandi. Unga uyining podyezdida hujum qilingan. Og‘ir tan jarohatlarini olgan 55 yoshli Mark Vayl shifoxonada vafot etgan.
Izoh (0)