Бир умрга озодликдан маҳрум қилинган Мисрнинг собиқ президенти Муҳаммад Мурси Қоҳирадаги суд жараёнида вафот этди. Бу ҳақда Masrawy хабар берди.

Хабарда айтилишича, Мурсига сўз берилгач, у сўнгги сўзини айтган ва шундан сўнг вафот этган.

Сиёсатчи 67 ёшда эди.

2013 йилда ҳокимиятдан четлатилган Мурси жосусликда айбланган. 2015 йилда собиқ давлат бошлиғи ва унинг 16 нафар тарафдори ўлимга ҳукм қилинган, аммо кейинчалик жазони бир умрлик озодликдан маҳрум қилишга алмаштирилган. Бу Мисрда 25 йилга тенг.

Мурсининг тарафдорлари бу қарорга қарши чиқишга уринган, аммо 2017 йилда Мисрнинг Апелляция суди ушбу қарорни тасдиқлаган.

«Мусулмон биродарлар» уюшмасининг етакчиларидан бири Муҳаммад Мурси 2013 йил 3 июль куни ҳарбий тўнтариш натижасида президентлик лавозимидан ағдарилган. Мисрда ҳозирда Абдул Фаттоҳ ал-Сиси президент ҳисобланади. Унинг ҳукмронлиги остида мамлакатда исломчиларни (радикал ва мўътадил) кенг қамровли таъқиб қилиш ҳамда ҳарбий ва ҳуқуқни муҳофаза қилиш тузилмаларининг умумий кучайиши бошланди. «Мусулмон биродарлар» уюшмаси фаолияти тақиқлаб қўйилди, уюшма аъзолари устидан судлар ташкил қилинди.

Мурсининг 2012 йилги президентлик сайловларида ғалаба қозонганидан сўнг, Миср Олий Конституцион судининг раиси Фарук Султон уни «халқ томонидан демократик йўл билан сайланган Мисрнинг биринчи президенти», деб атаган.