Самарқанд тумани Андижоний маҳалласидаги 30-сонли мактабгача таълим муассасаси ошхонасида газ баллони портлагани ҳақида хабар берган эдик.
Ўзбекистон Республикаси Мактабгача таълим вазирлиги ушбу ҳодисага муносабат билдирди.
Маълум қилинишича, жорий йил 13 июнь куни Самарқанд вилояти Самарқанд тумани Андижон маҳалласида жойлашган 30-мактабгача таълим ташкилоти (МТТ) ошхонасида соат 11:30 лар атрофида ўсимлик ёғи доғланаётганида ошпазнинг эътиборсизлиги сабаб ёғ ёниб кетиши оқибатида ёнғин келиб чиққан. МТТ мудираси томонидан ёнғин хавфсизлиги хизматига берилган хабардан сўнг 2 та ўт ўчириш машинаси етиб келган ва ёнғин бартараф этилган. Ёнғин оқибатида ҳеч кимга зарар етмаган. Тарбияланувчилар бу вақтда воқеа жойидан 30 метр узоқликдаги алоҳида бинода бўлган. Ёнғин давомида ҳеч қандай портлаш содир бўлмаган.
МТТ 2009 йилдан табиий газ тармоғидан узилган. Ҳозирда МТТ ошхонасида суюлтирилган газ баллонидан эмас, балки электроплитадан фойдаланилади. Ёнғин локал характерга эга бўлиб, унинг натижасида плита, музлаткич ҳамда ошхона жавони ишдан чиққан. Соат 14:30 лар атрофида МТТга ҳудудий тиббиёт бирлашмаси вакиллари етиб келган. Тарбияланувчилар шифокор ва психолог кўригидан ўтказилган. Ҳодисанинг болалар психикасига салбий таъсир кўрсатмагани аниқланган. Шу куни Самарқанд тумани ҳокими фармойишига кўра, ёнғин келиб чиқиш сабабларини ўрганиш, унинг оқибатларини қисқа муддатда бартараф этиш бўйича туман мутасадди ташкилотлари вакилларидан иборат ишчи гуруҳ тузилган ва улар воқеа жойида иш олиб борган.
Ушбу ҳолат Мактабгача таълим вазирлиги вакили томонидан жойига бориб ўрганилди. Туман мактабгача таълим бўлими томонидан ёнғин оқибатларини бартараф этиш бўйича кўрилган чора-тадбирлар натижасида МТТ ошхонаси таъмирдан чиқарилди ва қайта жиҳозланди. Ёнғин хавфсизлиги қоида ва меъёрларида белгиланган талабларни бузгани ҳамда меҳнат интизомига риоя қилмагани учун МТТ хўжалик мудири У.Расуловага интизомий жазо чораси қўлланилди. Айни кунда вазирлик мутасаддилари МТТларда ёнғин хавфсизлигини таъминлаш ва унинг олдини олиш бўйича тушунтириш ишларини олиб бормоқда.
Изоҳ (0)