Samarqand tumani Andijoniy mahallasidagi 30-sonli maktabgacha ta’lim muassasasi oshxonasida gaz balloni portlagani haqida xabar bergan edik.
O‘zbekiston Respublikasi Maktabgacha ta’lim vazirligi ushbu hodisaga munosabat bildirdi.
Ma’lum qilinishicha, joriy yil 13-iyun kuni Samarqand viloyati Samarqand tumani Andijon mahallasida joylashgan 30-maktabgacha ta’lim tashkiloti (MTT) oshxonasida soat 11:30 lar atrofida o‘simlik yog‘i dog‘lanayotganida oshpazning e’tiborsizligi sabab yog‘ yonib ketishi oqibatida yong‘in kelib chiqqan. MTT mudirasi tomonidan yong‘in xavfsizligi xizmatiga berilgan xabardan so‘ng 2 ta o‘t o‘chirish mashinasi yetib kelgan va yong‘in bartaraf etilgan. Yong‘in oqibatida hech kimga zarar yetmagan. Tarbiyalanuvchilar bu vaqtda voqea joyidan 30 metr uzoqlikdagi alohida binoda bo‘lgan. Yong‘in davomida hech qanday portlash sodir bo‘lmagan.
MTT 2009-yildan tabiiy gaz tarmog‘idan uzilgan. Hozirda MTT oshxonasida suyultirilgan gaz ballonidan emas, balki elektroplitadan foydalaniladi. Yong‘in lokal xarakterga ega bo‘lib, uning natijasida plita, muzlatkich hamda oshxona javoni ishdan chiqqan. Soat 14:30 lar atrofida MTTga hududiy tibbiyot birlashmasi vakillari yetib kelgan. Tarbiyalanuvchilar shifokor va psixolog ko‘rigidan o‘tkazilgan. Hodisaning bolalar psixikasiga salbiy ta’sir ko‘rsatmagani aniqlangan. Shu kuni Samarqand tumani hokimi farmoyishiga ko‘ra, yong‘in kelib chiqish sabablarini o‘rganish, uning oqibatlarini qisqa muddatda bartaraf etish bo‘yicha tuman mutasaddi tashkilotlari vakillaridan iborat ishchi guruh tuzilgan va ular voqea joyida ish olib borgan.
Ushbu holat Maktabgacha ta’lim vazirligi vakili tomonidan joyiga borib o‘rganildi. Tuman maktabgacha ta’lim bo‘limi tomonidan yong‘in oqibatlarini bartaraf etish bo‘yicha ko‘rilgan chora-tadbirlar natijasida MTT oshxonasi ta’mirdan chiqarildi va qayta jihozlandi. Yong‘in xavfsizligi qoida va me’yorlarida belgilangan talablarni buzgani hamda mehnat intizomiga rioya qilmagani uchun MTT xo‘jalik mudiri U.Rasulovaga intizomiy jazo chorasi qo‘llanildi. Ayni kunda vazirlik mutasaddilari MTTlarda yong‘in xavfsizligini ta’minlash va uning oldini olish bo‘yicha tushuntirish ishlarini olib bormoqda.
Izoh (0)