Болаларнинг боғча ёшидан тўғри овқатланишга одатланиши улғайганда нотўғри овқатланиш оқибатида юзага келадиган касалликлар олдини олиш имконини беради. Бу ҳақда Тошкент шаҳрида 11 май куни Мактабгача таълим вазирлиги томонидан ўтказилган мактабгача таълим муассасалари (MTM)да хавфсиз ва оқилона овқатланишни ташкил этиш мавзусига бағишланган давра суҳбатида вазирлик бўлим бошлиғи Умида Муҳитдинова айтиб ўтди.
Давра суҳбатида 2019 йил апрелида тасдиқланган «Ўзбекистон Республикаси мактабгача таълим муассасаларида хавфсиз ва оқилона овқатланишни ташкил этишга бўлган гигиена талаблари» Санитария нормалари ва қоидалари муҳокама этилди.
«Болаларнинг тўғри овқатланишга одатланиши улғайганда нотўғри овқатланиш оқибатида юзага келадиган касалликлар олдини олади. Бунда тарбияланувчилар рациони фойдали, мутаносиб бўлиши ҳамда унда умумий мактабгача таълим муассасалари тарбияланувчиларининг ёшлари инобатга олинган ҳолда тузилиши лозим. MTMларда соғлом овқатланишни йўлга қўйиш учун хавфсиз, тўйимли ва соғлом озиқ-овқат маҳсулотларининг доимий таъминотини кўзда тутувчи стандартларга узлуксиз равишда амал қилиш керак», — дейди ихтисослаштирилган MTM фаолиятини мувофиқлаштириш, болалар реабилитацияси ва саломатлигини таъминлаш бўлими бошлиғи Умида Муҳитдинова.
Маълум қилинишича, Мактабгача таълим вазирлиги овқатдан заҳарланиш ҳолатларини таҳлил қилиб, MTM ходимларининг санитария нормаларига риоя этиши юзасидан билимини ошириш ва масъулиятини кучайтириш зарурлигини аниқлаган. Шу сабабли, ходимларни санитария минимуми курсларида гигиена бўйича таълим олиши шартлиги белгилаб қўйилган. Шунингдек, бегона шахслар махсус кийимсиз ва тиббий кўрикдан ўтганлиги тўғрисидаги маълумотномасисиз озиқ-овқат блокига кириши тақиқланган.
Изоҳ (0)