Инновацион ривожланиш вазирлигининг Таълим ва соғлиқни сақлашга инновацияларни жорий қилиш ҳамда тадқиқ этиш бошқармаси бошлиғи Бахтинур Худанов Германиянинг Виттен/Хердекке университетида хизмат сафарида бўлиб, инновацион лойиҳалар ва ишланмаларни мамлакатда жорий этиш бўйича музокаралар олиб борди.Бу ҳақда «Дарё»га вазирлик матбуот хизмати маълум қилди.
Хусусан, ҳозирда жаҳондаги кўплаб мамлакатларда кенг қўлланилаётган ва Ўзбекистонда ривожланиб келаётган телетиббиёт йўналиши бўйича университет вице-президенти Ян Эхлерс ва махсус стоматологик хизмат кафедраси мудири Андреас Шулте билан учрашди. Учрашув давомида Германия тиббиёти, тиббий таълимдаги эришилган натижалар, инновациялар ҳақида тўхталиб ўтилди. Уларни Ўзбекистонда жорий қилиш борасида самарали келишувларга эришилди.
Германиялик мутахассислар билан вазирлик томонидан Қорақалпоғистоннинг Мўйноқ туманида ташкил этилиши режалаштирилаётган телетиббиётга асосланган инновацион клиника лойиҳаси муҳокама қилинди. Хорижлик экспертлар лойиҳага юқори баҳо берди ва у марказдан узоқда жойлашган аҳоли учун жуда муҳимлиги, аҳолининг вақти ҳамда сарф-харажатларини тежаш, шу билан бирга ташхислаш ва маслаҳат бериш сифатини оширишга хизмат қилишини таъкидлади. Ушбу тизим Австралия, АҚШ, Нидерландия, Германия, Ҳиндистон каби давлатларда кенг қўлланилаётгани ва аҳоли бундан мамнун эканлиги айтиб ўтилди.
Шу билан бирга, Ўзбекистон аҳолисининг стоматологик касалликлар, хусусан, кариес ва унинг асоратларига чалиниш даражаси, унинг жадаллигини ўрганиш бўйича ишлар узоқ вақтдан бери тўхтаб қолганлиги, бу эса стоматологик касалликлар ривожланиш тенденциясини аниқлаш, профилактик чора-тадбирларни ишлаб чиқиш ва жорий қилишни қийинлаштираётгани илмий далиллар асосида муҳокама қилинди. Ушбу соҳада ҳам илмий изланиш олиб бориш учун грант лойиҳасини тайёрлаш ишлари ҳамкорликда бошлаб юборилди.
Изоҳ (0)