Қирғизистон пойтахти Бишкекда Шанхай ҳамкорлик ташкилотига аъзо давлатлар Ёшлар Кенгаши йиғилиши бўлиб ўтди. Унда Ўзбекистон делегацияси ҳам қатнашди. Бу ҳақда «Дарё»га Ёшлар медиа маркази маълум қилди.
Халқаро мулоқот майдонида ШҲТ Ёшлар Кенгашининг 2018—2019 йиллар давомида амалга оширилган ишлар якуни бўйича маълумот берилиб, 2019—2020 йилларга мўлжалланган иш режаси тасдиқланди.Муҳокамалар мобайнида Покистон ва Ҳиндистон ёшларининг ШҲТ Ёшлар Кенгашига қўшилиши, ШҲТ Ёшлар Кенгашининг давлат раҳбарларига мурожаатини ишлаб чиқиши, ташкилотга аъзо мамлакатлар ўртасидаги алоқаларни ҳар томонлама кенгайтириш масалалари ҳам ўртага ташланди.
Йиғилишда Ўзбекистон ёшлар иттифоқи делегацияси раҳбари Қаҳрамон Қуронбоев 2020 йилда ШҲТ қишки оромгоҳини Тошкентда ўтказиш ҳамда Хивада ШҲТ бизнес стартапини ташкил этиш каби ташаббусларни илгари сурди.
Ўзбекистон делегацияси вакиллари Қирғизистон Спорт ва ёшлар вазири билан мулоқот қилиб, ёшлар туризмини ривожлантириш ва оммавий спортни тарғиб этишга қаратилган мусобақаларни биргаликда ўтказишга келишиб олди.
Мажлисда илгари сурилган ташаббуслардан келиб чиққан ҳолда Шанхай ҳамкорлик ташкилотининг 2019—2020 йиллар бўйича 5 та лойиҳаси Ўзбекистонда ўтказиладиган бўлди. 2019 йилнинг октябр ойида Тошкентда ШҲТга аъзо давлатлар ўртасида «Starтаплар форуми» ташкил этилиб, ноябрда PROlogue V халқаро кинофестивалга ҳам старт берилади.
Ноябрь ойида эса Самарқандда ШҲТ давлатлари ёшлари ўртасида «Дўстлик учун!» шиори остидаги веломарафон бўлиб ўтади. 2020 йилнинг январь ойида ШҲТ қишки ёшлар оромгоҳи ташкил этилади. Баҳорнинг илк ойида эса Тошкент шаҳрида ўтказилиши режалаштирилаётган ҳаваскор ёшларнинг футбол бўйича I чемпионати ва волейбол бўйича турнири ШҲТнинг Ўзбекистондаги лойиҳаларини якунлаб беради.
Изоҳ (0)