Избоскан тумани Чувама маҳалласида яшовчи фуқаро Абдусамат Жололов ичкилик туфайли Ички ишлар ходими билан жанжаллашиб, уни ҳалок қилди. Бунга унинг укаси Санъатбек ва жияни Зуҳробиддин ҳам шерик бўлган. Бу ҳақда ЎзА хабар берди.
Эндигина 31 ёшини қаршилаган, икки фарзанднинг отаси А.Жололов синфдош дўстлари билан бир дўстининг уйида тўйиб ароқ ичади. Зиёфат тунгги соат бирга қадар давом этади. Улфатлар ярим тунда бақир-чақир билан кўчага чиқади. Уйларига тарқалиш учун маҳалла гузарига келади.
Шу пайт жамоат тартибини сақлаш мақсадида хизмат вазифасини бажариб юрган Избоскан туман ички ишлар бўлими тезкор вакиллари С.Якубов ва I.Ҳайдаров келиб қолади. Улар шовқин кўтариб, гаплашиб турган йигитлар олдига келиб, кеч бўлиб қолгани, уй-уйларига тарқалишлари кераклигини айтади. Ўта маст бўлган А.Жололов Ички ишлар бўлими ходимларининг қонуний талабларига бўйсунмасдан, уларни куракда турмайдиган сўзлар билан ҳақорат қилади.
Гувоҳларнинг кўрсатмаларига кўра, орада жанжал бошланган. Ички ишлар ходимлари телефон орқали ҳудуд профилактика инспекторини, А. Жололов эса шеригининг телефони орқали укасини тезда маҳалла марказига етиб келишини сўрайди.
Нотаниш телефон рақамидан акасининг чақирганини эшитиб укаси Санъатбек, жияни Зуҳробиддинни чақириб, маҳалла гузарига етиб келади. Улар акасининг бир киши билан жанжаллашаётганини кўриб, ёрдамга шошади. Уруш, жанжал оқибатида Ички ишлар ходими С.Яқубов тан жароҳати олади, I.Ҳайдаров эса вафот этади.
Жиноят ишлари бўйича Андижон вилояти суди судьяси Улуғбек Каримов раислигида бўлиб ўтган суд мажлисида атрофлича ўрганиб чиқилган юқоридаги жиноий иш бўйича ҳукм чиқарилди.
Суд ҳукмига кўра, А.Жололов айбдор деб топилиб, унга 16 йил озодликдан маҳрум қилиш жазоси тайинланди. Шунингдек, ушбу жиноятнинг содир этилишида иштирок этгани учун укаси йигирма тўққиз ёшли С.Жололовга 15 йил-у 9 ой, эндигина йигирма беш ёшни қаршилаган жияни З.Қобуловга 15 йил-у 6 ой қамоқ жазоси тайинланди.
Изоҳ (0)