Президент ташаббуси билан Қорақалпоғистонда Ички ишлар вазирлиги, Мудофаа вазирлиги ва Миллий гвардиянинг жиноятчиликка қарши курашиш фаолиятини бевосита амалга оширувчи ходимлари билан ихтисослаштирилган ўқув-амалий курслари ташкил этилиб, жиноятлар сони 40 фоизга камайишига эришилди. Наманганда ҳам Қорақалпоғистон тажрибаси амалда татбиқ этилмоқда. Бу ҳақда «Дарё»га вилоят ИИБ матбуот хизмати маълум қилди.
Наманган вилояти ички ишлар органлари ходимларининг касбий, жанговар, жисмоний ва ахлоқий-психологик тайёргарлик даражаси ошириш, уларнинг маънавий-ватанпарварлик тарбиясини юксалтириш хамда назарий билимларини мустахкамлаш мақсадида Шарқий ҳарбий округнинг Поп туманидаги ҳарбий қисми базасида ихтисослаштирилган ўқув-амалий курслари 1-ўқув йиғинининг очилиш маросими бўлиб ўтди.
Унда вилоят ҳокими, вилоят ИИБ бошлиғи, Миллий гвардия вилоят бўлими бошлиғи, ҳарбий қисм раҳбарлари иштирок этди.
Ўқув-амалий курслари узлуксиз ва сифатли ўтиши учун ҳарбий округ ҳудудидан алоҳида бино ажратилиб, ундаги ҳар бир хона зарур шарт-шароит ҳамда моддий база билан тўлиқ таъминланди. Республика ҳарбий бўлинмалари билан узвий ҳамкорликни йўлга қўйиш мақсадида видеоконференсия усулида машғулотларни ўтказиш хонаси ташкил этилди. Дарс ва спорт машғулотларини эса узоқ йиллик тажрибага эга мутахассислар олиб бормоқда.
Изоҳ (0)