Очиқ осмон остидаги музей шаҳар — «Ичан қалъа»нинг «Кўҳна Арк» майдонида Паҳлавон Маҳмуд номидаги I халқаро баҳодирлар ўйинларига старт берилди. Бу ҳақда ЎзА маълум қилди.
Халқаро номланиши Strong men деб аталувчи ушбу мусобақа илк бора Хива шаҳрида бўлиб ўтмоқда. Унда Ҳиндистон, Эрон, Туркия, Покистон, Латвия, Россия каби 20 мамлакатдан жаҳоннинг энг кучли полвонлари иштирок этмоқда.
— Мусобақа сабаб Ўзбекистонга келганимдан хурсандман, — дейди Strong men ўйинлари совриндори эронлик Ризо Гижаетаси. —Менинг юртимда ҳам Паҳлавон Маҳмуднинг номи катта ҳурмат, эҳтиром билан тилга олинади. Биз паҳлавонлар ушбу зотни полвонлар пири деб биламиз. Ушбу улуғ инсон яшаб ўтган жойларда бўлиш мен учун шараф.
Паҳлавон Маҳмуд номидаги «Баҳодирлар ўйини» I халқаро турнирининг асосий тадбирлари бугун Хива шаҳрининг турли жойларида бўлиб ўтади.
Изоҳ (0)