Қонунчилик муаммолари ва парламент тадқиқотлари институти 7 июнь куни Олий Мажлис Қонунчилик палатасининг Экология ва атроф муҳитни муҳофаза қилиш масалалари қўмитаси билан ҳамкорликда «Овчилик ва ов хўжалиги тўғрисида»ги қонун лойиҳаси муҳокамасига бағишланган давра суҳбати ўтказди. Хабар беришларича, тадбирда овчилик ва ов хўжалиги соҳасининг бугунги ҳолати, соҳадаги мавжуд муаммолар ва уларнинг ечими бўйича таклифлар муҳокама қилинган.
Бугунги кунда Ўзбекистонда 38 мингдан ортиқ овчи рўйхатга олинган. Мамлакатда умумий майдони 406 минг гектар бўлган 5 та давлат ўрмон-ов хўжаликлари ҳамда Овчи ва балиқчилар спорт бирлашмасига қарашли умумий майдони 608 минг гектарни ташкил этувчи 38 та ов хўжаликлари фаолият юритмоқда.
Овчилик ва ов хўжалиги соҳасидаги ҳуқуқий база 10 дан ортиқ қонуности ҳужжатларидан иборат. Ушбу соҳадаги муносабатларни тарқоқ ҳолда тартибга солишга, ҳуқуқни қўллаш амалиётида турли қарама-қаршилик ва талқинлар, мураккабликларга олиб келмоқда. Хусусан, 2015—2018 йиллар мобайнида қарийб 20 мингга яқин ҳуқуқбузарликлар аниқланган.
Қонунчилик муаммолари ва парламент тадқиқотлари институти томонидан Қонунчилик палатасининг Экоҳаракат депутатлик гуруҳи ва Экология ва атроф-муҳитни муҳофаза қилиш давлат қўмитаси билан ҳамкорликда тўғридан-тўғри амал қилувчи «Овчилик ва ов хўжалиги тўғрисида»ги қонун лойиҳаси тайёрланган.
«Қонун лойиҳасида барча масалалар батафсил тартибга солинмоқда. Бу қонун амалга оширилиши учун қонуности ҳужжатларининг қабул қилинишини талаб этмайди», — дейилади Олий Мажлис Қонунчилик палатаси матбуот хизмати ахборотида.
Хусусан, қонун лойиҳасида соҳага оид давлат сиёсатининг асосий йўналишлари, ов қилиш ҳудудлари, ов ҳайвонларини тутиш нормалари ва муддатлари, ов хўжалигини юритишнинг асосий қоидалари назарда тутилди. Шунингдек, ов ҳайвонлари ва уларнинг яшаш муҳити устидан давлат мониторинги тизими жорий этилиши, ов қилиш ҳуқуқини тасдиқловчи ҳужжатларнинг аниқ рўйхати белгиланмоқда. Қонун лойиҳасида ҳар бир ёввойи ҳайвон туридан келиб чиқиб, уларни овлаш учун тўлов миқдорлари илк бор қонун даражасида мустаҳкамланмоқда.
Мамлакатда ов туризмини ҳар томонлама ривожлантириш ва мазкур имкониятлардан тўлиқ фойдаланиш мақсадида лойиҳада хорижий фуқаролар учун ов туризмининг ўзига хос хусусиятлари назарда тутилмоқда. «Қонун лойиҳасини тайёрлашда илғор хорижий мамлакатлар, хусусан Германия, Франция, Япония, Туркия, Россия ва Қозоғистоннинг соҳага оид тажрибаси инобатга олинганлиги таъкидланди», — дейилади хабарда.
Тадбирда қонун лойиҳасини қабул қилиш ов ҳайвонлари ресурсларидан оқилона фойдаланиш, улар ҳисобини юритиш, уларни кўпайтириш ва тутиш нормаларини тартибга солишга, ов туризмини ривожлантиришга ҳамда ов хўжаликлари ҳолатини яхшилашга хизмат қилиши таъкидланган.
Изоҳ (0)