Ўзбекистон Президенти Шавкат Мирзиёев 7 июнь куни Қозоғистон Парламенти Мажлиси раиси Нурлан Нигматулин бошчилигидаги делегацияни қабул қилди. Бу ҳақда Президентнинг расмий веб-сайтида хабар берилди.
Шавкат Мирзиёев меҳмонларни самимий қутлар экан, Қозоғистон парламенти делегациясининг Ўзбекистонга ташрифи қардош мамлакатлар ўртасидаги дўстлик, яхши қўшничилик ва стратегик шериклик муносабатлари тобора мустаҳкамланиб бораётганидан далолат беришини алоҳида таъкидлади.
Ўз навбатида, Қозоғистон Парламенти Мажлиси раиси самимий қабул учун Президентга чуқур миннатдорлик билдириб, Қозоғистоннинг биринчи президенти — Элбоши Нурсултон Назарбоев ва амалдаги президенти Қосим-Жўмарт Тоқаевнинг саломи ва эзгу тилакларини етказди.
Учрашувда томонлар Қозоғистон президенти Қосим-Жўмарт Тоқаевнинг жорий йил апрель ойида амалга оширилган Ўзбекистонга илк давлат ташрифининг якунлари кўп қиррали ҳамкорликни янада кенгайтириш, уни амалий мазмун билан бойитиш борасида ўзаро интилиш қатъий эканини яна бир бор тасдиқлаганини таъкидлади.
Икки томонлама савдо ҳажми ортиб бораётгани мамнуният билан қайд этилди. 2018 йилда товар айирбошлаш 50 фоизга ўсиб, 3 миллиард доллардан ошди. Яқин йилларда бу кўрсаткични камида 5 миллиард долларга етказиш вазифаси турибди.
Мамлакатлар етакчи компания ва корхоналари иштирокида кооперация асосида истиқболли лойиҳалар амалга оширилмоқда. Транспорт соҳасида янги автобус ва темир йўл йўналишлари очилди, шаҳарлар ўртасидаги авиақатновлар кўпайтирилди, юк ташиш ҳажми ортмоқда.
Ҳудудлараро алоқалар тобора мустаҳкамланмоқда, маданий-гуманитар алмашинув кенгаймоқда. Ўтган йили Қозоғистонда Ўзбекистон йили муваффақиятли ўтказилди, жорий йилда эса Ўзбекистонда тадбирларга бой дастур асосида Қозоғистон йили ўтмоқда.
Учрашувда Ўзбекистон-Қозоғистон парламентлараро ҳамкорлигини янада ривожлантиришнинг долзарб масалалари кўриб чиқилди.
Мамлакатлар парламентлари қўмиталари даражасида фаол алоқаларни йўлга қўйиш, эришилган келишувларни ўз вақтида амалга ошириш ва янги шериклик лойиҳаларини илгари суриш мақсадида парламентлараро дўстлик гуруҳлари имкониятларидан янада самарали фойдаланиш лозимлиги қайд этилди.
Нурлан Нигматулин Қозоғистон Парламенти парламентлараро муносабатларни янада мустаҳкамлашда, шунингдек, қардош халқлар ўртасидаги кўп қиррали ҳамкорликни кенгайтиришга қаратилган ташаббусларни рўёбга чиқаришда ҳар томонлама кўмаклашишга тайёр эканини таъкидлади.
Учрашув якунида Шавкат Мирзиёев Қозоғистон сиёсий ҳаётидаги энг муҳим тадбир — жорий йил 9 июнь куни бўлиб ўтадиган Президент сайлови муваффақиятли ўтишини тилади.
Изоҳ (0)