Навоий вилоятининг Учқудуқ туманида 3 июнь куни кучли шамол ва ёмғир оқибатида сел келиши кузатилди. Хусусан, «Обод қишлоқ» дастурига киритилган «Йўлчилар» овул фуқаролар йиғинидаги бир неча хонадонни сув босган, овулдан ўтган трассанинг бир қисмини сел ювиб кетган.
Овулда истиқомат қилувчи Умида Зафарованинг «Дарё»га хабар беришича, унинг хонадони ичини бир метргача сув босган, пол ўпирилиб кетган, кучли шамол оқибатида уйининг томи қулаган. Шамол вақтида симёғоч ёниб, хонадон электр тармоғидан узилиб қолган.
«Ёрдам сўраб туман ҳокимлигига борганимда, ҳоким ўринбосари: ‘Селни биз қилмадик, талофатни бартараф этиш бўйича давлат пул ажратмаган, қачонки бирор ҳомий чиқса, уйингизни таъмирлаб берамиз’, деб жавоб берди», — дейди «Йўлчилар» ОФЙда истиқомат қилувчи аёл.
Учқудуқ тумани ҳокимлиги вакиллари Умида Зафарова 4 июнь куни мурожаат билан келганини тасдиқлади. Туман ҳокимининг иқтисодиёт ва тадбиркорлик масалалари бўйича биринчи ўринбосари Фаррух Бафоевнинг «Дарё»га маълум қилишича, ҳокимлик селдан зарар кўрган фуқароларга ёрдам кўрсатишдан қочмайди, фақат аввал табиий офат келтирган зарар ҳисоблаб чиқилиши керак.
«Умида Зафаровага юз берган ҳолат табиий офат эканлигини, унинг оқибатларини бартараф этишни ҳеч ким ўз зиммасига олмаслигини айтдим. Сел келтирган зарар хисоблаб чиқилгач, уй таъмирига ёрдам берилишини билдирдим. Лекин у аёл нақд пул беришни талаб қилди. Биз унга тушунтирдик. Комиссия ўрганиб чиққанидан сўнг, уй таъмирига ёрдам кўрсатилади. Бунда тадбиркорлар томонидан тақдим этиладиган ҳомийлик маблағларидан ҳам фойдаланилади», — деди Бафоев.Ҳоким ўринбосарининг қайд этишича, сел келган куниёқ ҳодиса жойига туман ҳокими ва мутассади ташкилотлар раҳбарлари етиб борган, ҳодиса юзасидан штаб тузилган. «Йўлчилар» овул фуқаролар йиғинида жами 21 та хонадоннинг ҳовли қисмини сув босган, иккита хонадоннинг кўча томондан ўраб турган девори қулаган, фақат битта хонадоннинг уй қисмига бир метр эмас, балки 20 сантиметр сув кирган. Ҳозирда етказилган зарар миқдори ҳисоблаб чиқилмоқда.
«Йўл бўлими ходимлари томонидан уйлар ичида йиғилган сув чиқариб ташланди. Шунингдек, овулдан ўтувчи кенглиги 6 метр бўлган йўлнинг бир қисмини ҳам сел ювиб кетган. Симёғочлар ёниб кетмаган, аксинча, сел вақтида фуқаролар хавфсизлигини таъминлаш мақсадида овул хонадонлари вақтинча электр тармоғидан узиб қўйилди», — деди Учқудуқ тумани ҳокимлиги вакили.
Фаррух Бафоевнинг алоҳида қайд этишича, овулдаги баъзи уйлар ўзбошимчалик билан сой ўзанига қуриб олинган. Аҳоли бу ҳақда аввалдан огоҳлантирилган, аммо хавфсизлик чоралари кўрилмагани боис, айрим хонадонларни сел босган.
Қайд этиш жоиз, тошқинлар туман маркази Учқудуқ шаҳрида ҳам кузатилган.
Изоҳ (0)