«Дарё» 2018 йилнинг август ойида «Ургут тумани ички ишлар ходимлари ўғриликка шерикми?» сарлавҳаси остида мақола эълон қилган эди. Унда Самарқанд вилояти Ургут тумани Бахрин маҳалласида яшовчи фуқаро Феруз Фармонов Ургут туман Ички ишлар органи фаолиятини мувофиқлаштириш бўлими Қоратепа милиция таянч пункти ходимлари томонидан 4 ойдан буён унинг йўқолган қора молларини топиш бўйича берган аризаси ўрганилмаётганлиги тўғрисида мурожаат қилганди.
Мазкур мурожаатдан сўнг Самарқанд вилояти ИИБ Тергов бўлими томонидан йўқолган моллар топилиб, молларни ўғирлаган шахслар қўлга олиниб, тергов-суриштирув ишларини олиб борган.
Жиноят ишлари бўйича Ургут туман судида судья Ж.Арслонов раислигида Нурбек Ёриқулов ва Сардор Ҳамроқуловнинг жиноят иши кўриб чиқилди.
Суд жараёнида маълум бўлишича, судланувчи Нурбек Ёриқулов ва Сардор Ҳамроқулов ўзганинг мол-мулкини яширин равишда талон-торож қилиш мақсадида жиноий тил бириктирган. Нурбек Ёриқулов ва Сардор Ҳамроқулов 2018 йилнинг апрель ойи давомида Ургут тумани, «Баҳрин» маҳалласи ҳудудидаги «Еттиуйлик сой» тоғ-ён бағрида Феруз Фармоновнинг боқувида бўлган «Баҳрин» маҳалласида яшовчи фуқароларнинг кўп миқдордаги қорамолларини яширин равишда талон-торож қилган.
2018 йилнинг 5 май куни Қашқадарё вилояти, Чироқчи туманида яшовчи фуқаро Рўзимурод Бекмуродовдан олинган 2 бош қора мол, 2018 йилнинг 9 октябрь куни Ургут тумани, «Баҳрин» маҳалласида яшовчи фуқаро Й.Муродов томонидан таниб олинган.
Суд жараёнида судланувчи Нурбек Ёриқулов ва Сардор Ҳамроқулов суд терговида айбларига қисман иқрорлик билдирди. Суд мажлисида сўралган жабрланувчилар, гувоҳлар ва қўшимча гувоҳларнинг кўрсатувлари уларнинг айби билан ўз исботини топди.
Суд ҳукмига кўра, судланувчи Нурбек Ёриқулов Жиноят Кодексининг 169-моддаси 3-қисми «в» банди (кўп миқдорда ўғрилик) билан 6 йил 6 ой, Сардор Ҳамроқулов 5 йил муддатга озодликдан маҳрум қилиш жазоси тайинланди.
Нурбек Ёриқулов ва Сардор Ҳамроқуловдан жабрланувчилар фойдасига 92 200 000 сўм моддий зарар ундирилиши белгиланди.
Изоҳ (0)