Ўзбекистон болалар ҳаёти сифати рейтингида 72-ўринни эгаллади

Ўзбекистонда болалар ҳаёти сифати 789 баллдан 887 баллга кўтарилиб, 98 поғонага яхшиланди. «Podrobno.uz»нинг хабар беришича, Ўзбекистон Save The Children халқаро фонди томонидан тузилган «Болалик қачон тугайди — 2019» (End of Childhood Index), рейтингида 72-ўринни эгаллади.

Рейтингда дунё давлатлари 1 дан 1000 баллгача бўлган шкалада баҳоланади. Муаллифлар болаликнинг эрта тугашига сабаб бўладиган омиллар, хусусан, болалар ўлими, вояга етмаганлар никоҳи, болалар меҳнатидан фойдаланиш ва эрта ҳомиладорлик кабиларни ҳисобга олган.

МДҲ давлатлари орасида Қозоғистон бу рейтингда 40-ўринни, Украина — 42, Тожикистон — 90, Туркманистон — 87, Қирғизистон — 94, Россия эса 38-ўринни эгаллади.

Рейтинг маълумотларига кўра, болалар ҳаёти сифати бўйича умумий ҳолат 2000 йилга нисбатан рейтингдаги 176 давлатдан 173 тасида яхшиланган.

Рейтингнинг юқори поғоналаридан одатда бошқа кўрсаткичлар бўйича ҳам етакчиликни эгаллаб келаётган мамлакатлар ўрин олди. Биринчи ўринни Сингапур эгаллади. Кучли ўнталикка, шунингдек, Швеция, Финляндия, Норвегия, Словения, Германия, Ирландия, Италия, Жанубий Корея ва Бельгия давлатлари кирди.