Наманган вилояти ҳокимининг ўринбосари Баҳромжон Нурматов бошчилигидаги делегация Италияда бўлиб қайтди. Бу ҳақда ТИВ матбуот хизмати маълум қилди.
Сафардан кўзланган мақсад Италиянинг очиқ осмон остида археология музейлари ва улар ҳудудида оммавий тадбирлар ўтказиш борасидаги тажрибани ўрганииш, келгусида Ахсикент археологик мажмуаси лойиҳаси бўйича тегишли таклифлар тайёрлаш бўлди.
Делегация аъзолари Италия маданий мерос вазирлиги, Рим мерияси, пойтахт «Сапиенса» университети, Осиё ва Африка Ўрта ер денгизи институти, Сивита фонди ва қатор компаниялар билан музокаралар ўтказди.
Делегация Рим форуми, Колизей, Миллий музей, «Остия Антика» порти каби машҳур маданий-тарихий объектлар, реставрация ва консервация институтларида бўлди. Қадимги Рим даврига саёҳат уюштириладиган 3D форматдаги «Юлий Цезар форуми» мультимедиали тарихий шоусида иштирок этди.
Музокаралар якунида Ахсикент лойиҳасини ривожлантириш борасида ҳамкорликни чуқурлаштириш, илмий шерикликни йўлга қўйиш бўйича дастлабки келишувларга эришилди.
Изоҳ (0)