2018 йилнинг 11 декабрь куни соат тахминан 18:00 атрофида Раҳматилла Маҳрамов Булунғур тумани «Улуғбек» МФЙдаги ўзининг яшаш уйида спиртли ичимлик истеъмол қилиб турганида унинг олдига маст ҳолатда бўлган икки улфати М.А. ва Ф.Н. келган. Улар Ф.Н.нинг сочини олиб қўйишини айтган.
Раҳматилла Маҳрамов маст ҳолатда бўлган Ф.Н.нинг сочини олаётганида уни камситишган. Қолаверса, улар ўзлари билан олиб келган спиртли ичимликни Раҳматилла Маҳрамовнинг хоҳишига қарши истеъмол қилишини талаб қилган. Мажбурий тарзда спиртли ичимлик ичган Раҳматилла Маҳрамов уларга нисбатан бўлган нафрати уйғониб, қаршилик қилиш учун жисмоний кучи етмаслигини англаб, гўёки ўзини уларнинг олдида хушмуомала тутиб, қасд олишни режалаштирган.
Спиртли ичимлик истеъмол қилиши давомида улар ўртасидаги келишмовчилик янада авж олган. Ўзининг жисмонан заифлигини билган Раҳматилла Маҳрамов олдиндан ўйланган жиноий режа асосида Ф.Н. ва М.А.ларни қасддан ўлдиришида фойдаланиш учун ошхона пичоғини тўшагидаги ёстиғи тагига яшириб қўйган.
Раҳматилла Маҳрамов ўзини ҳолдан тойган одамдек тутиб, спиртли ичимлик истеъмол қилиб турган Ф.Н. ва М.А.ларга ухлашини айтган. У хонанинг чироғини ўчириб, ўзини гўёки ухлаб қолгандек тутиб, Ф.Н. ва М.А.ни ухлаб қолишини кутиб турган.
Ф.Н. ва М.А. ухлаб қолганига ишонч ҳосил қилганидан сўнг Раҳматилла Маҳрамов ёстиғининг тагида яшириб қўйган ошхона пичоғини олиб, маст ҳолатда ухлаб ётган улфатларига тан жароҳати етказган.
Раҳматилла Маҳрамов М.А.ни қасддан ўлдирганига тўлиқ ишонч ҳосил қилгач, жиноий ниятини якунига етказиш учун Ф.Н.ни қасддан ўлдириш мақсадида унинг қорин ва кўкрак соҳаларига қўлида бўлган ошхона пичоғи билан яна бир неча маротаба урган.
Раҳматилла Маҳрамов етказган тан жароҳатлари Ф.Н.нинг ҳаёти учун хавфли эканлигини англаб, уни вафот этди деб ўзининг жиноий ҳаракатларини тўхтатган. Бироқ Раҳматилла Маҳрамовнинг қўшниси тез тиббий ёрдамга қилган мурожаати асосида шифокорлар Ф.Н.нинг ҳаётини сақлаб қолган.
Жиноят ишлари бўйича Самарқанд вилоят суди судьяси Тўлқин Қодировнинг «Дарё»га маълум қилишича, Раҳматилла Маҳрамов Жиноят Кодексининг 97-моддаси 2-қисми «а, в» бандларида (икки ёки ундан ортиқ шахсни; айбдорга аён бўлган ожиз аҳволдаги шахсни қасддан ўлдириш) назарда тутилган жиноятларни содир этганликда айбли деб топилиб 22 йил муддатга озодликдан маҳрум қилиш жазоси тайинланди.
Изоҳ (0)