АҚШ Туркиянинг Россиядан С-400 зенит ракета тизимини сотиб олиши сабабли уни F-35 қирувчи бомбардимонлари дастурида иштирок этишини бекор қилиши ва Анқарага қарши CAATSA («Америка рақибларига санкциялар воситасида курашиш тўғрисида») қонуни доирасида санкциялар жорий этиши мумкин. «РИА Новости»нинг хабар беришича, бу ҳақда Давлат департаменти вакили Морган Ортагус маълум қилган.
«Бизнинг позициямиз аввалгидек қолади. Агар Туркия С-400 бўйича битимни тугаца, жуда салбий оқибатларга дуч келади», — деган Ортагус хоним брифингда.
Кейинчалик Туркиянинг АҚШдаги элчиси Сердар Қилич Анқара F-35 ни С-400 қамрови ҳудудидан ташқарида жойлаштиришини айтган.
Эслатиб ўтамиз, Туркияга қиймати 2,5 миллиард долларлик С-400 тўртта ракета тизимини етказиб бериш тўғрисидаги битим 2017 йилнинг июль ойида имзоланган. Улар 2020 йилнинг март ойида келтирилиши кутилаётган эди, лекин кейинроқ Анқара ва Москва бу жараённи тезлаштиришга келишиб олган.
Аввалроқ Туркия Россиянинг С-400 ракета тизимлари сабаб АҚШ санкцияларига тайёргарлик кўришни бошлагани ҳақида хабар берилган эди.
Изоҳ (0)