ЎзА Фарғона вилояти Қува тумани «Ғалаба» маҳалла фуқаролар йиғинидаги кўримсиз уй-жойлар, ташландиқ ҳолатдаги майдонлар, ахлат уюмлари мутасаддилар эътиборидан четда қолаётгани ҳақида мақола чоп этди. Қуйида мақола тўлиқлигича эътиборингизга ҳавола этилади.
Қува – Фарғона вилоятининг аҳолиси кўп, анорию гилоси билан машҳур бўлган туманларидан бири. Кейинги йиларда туманни ижтимоий-иқтисодий ривожлантириш, «Обод қишлоқ» ва «Обод маҳалла» дастурлари асосида муайян ишлар амалга оширилгани эътиборга лойиқ.
Афсуски, бу борада белгиланган чора-тадбирларнинг аксарияти қоғозда қолиб кетмоқда. Амалда эса аҳолининг турмуш даражасини янада яхшилашга қаратилган ишларнинг бажарилмаганлигини қандай изоҳлаш мумкин? Хусусан, ўтган йилда туман марказида жойлашган «Ғалаба» маҳалла фуқаролар йиғинида «Обод маҳалла» дастури асосида ишлар бошланганда бу ерда истиқомат қилувчи аҳоли хурсанд бўлганлиги рост. Афсуски, маҳалла қиёфасини янгилаш мақсадида қабул қилинган дастур ўлда-жўлда қолиб кетмоқда.
Туман маркази деганда кўз олдимизга обод маскан келади. Қувада эса аксинча.
Мазкур йиғинда 38 та кўп қаватли уйлар бўлиб, уларнинг аксарияти таъмирга муҳтож бўлиб қолганди. Канализация тармоғи йўқ, ичимлик суви таъминоти ҳам талаб даражасида эмасди. Шунингдек, ҳудудда ноқонуний иншоотлар ҳам кўп эди. Бу ерда бир қатор уйларни фасад қисмини таъмирлаш, ноқонуний иншоотларни бузиш, айрим кўчаларга асфальт ётқизиш, электр-энергияси, кўча чироқларини ўрнатиш ишлари бажарилди. Аммо бу борадаги ишлар охирига етказилмай қолди. Кўп қаватли уйларда истиқомат қилувчи аҳоли учун умуман шароит яратилмаган. Болалар майдончалари йўқ, умумий фойдаланишдаги ҳожатхона ҳақида гапирмаса ҳам бўлади. 16, 10, 18 кўп қаватли уйларнинг фасад қисми таъмирга муҳтож бўлиб, айрим ҳудудларни бегона ўтлар босган, ташландиқ ҳолатга келган. Ичимлик суви тармоғи ҳам кўчада бўлиб, аҳоли шундан фойдаланади. Ахлат уюмларининг бадбўй ҳидидан дилингиз хира бўлиши аниқ.
–40 йилдан буён шу кўп қаватли уйда яшаб келаман, – дейди Раҳимахон Қурбонова. – Ҳолатни ўзинглар кўриб турибсизлар. Айниқса, бозордагилар ариққа ахлатларини ташлашади. Йўлакчаларимиз ҳам бир абгор ҳолатда. Қанча мутасаддилар келиб ваъда беришади-да кетишади, амалий ишдан дарак йўқ.
Маҳалла фуқаролар йиғини раиси Музаффар Ўринбоевнинг айтишича, бу ерда 2 минг 300 дан зиёд аҳоли истиқомат қилади. Кўп қаватли уйларга 7 та уй-жой мулкдорлари ширкати хизмат кўрсатмоқда.
«Обод маҳалла» дастури ижросининг таъминланмаганлиги аҳолимизнинг ҳақли эътирозига сабаб бўлмоқда, – дейди М. Ўринбоев. –Ҳали қилинадиган ишлар жуда кўп. А. Яссавий кўчаси ва кўп қаватли уйларнинг олд қисмига кўча чироқлари ўрнатилмаган, болалар майдончаси қурилмади, тоза ичимлик суви тармоғини тортиш ишлари якунламади. Биз бу борада туман ҳокимлигига мурожаат қилдик. Улар бу ишлар маҳаллий бюджетдан ажратилган маблағ эвазига бўлишини, ҳозирда пул йўқлигини айтмоқда.
Биз туман ҳокимлигининг мутасаддилари билан гаплашганимизда ҳам худди шу гапни такрорлашди. Ажабланарлиси, ҳудудга масъул бўлган сектор раҳбари-туман давлат солиқ инспекцияси бошлиғи бу ишларга бефарқлик билан муносабатда бўлмоқда.
«Обод қишлоқ«, «Обод маҳалла» дастури, аввало, кўнгил ободлигидир. Шу маънода, аҳоли ўртасида мамлакатимизда амалга оширилаётган ислоҳотларга дахлдорлик туйғусини ошириш, яратувчанлик, ташаббускорлик ва тадбиркорликка бўлган интилишини қўллаб-қувватлаш, лоқайдлик ва боқимандалик кайфиятини йўқотиш борасида тарғибот-ташвиқот тадбирлари ҳам олиб борилиши керак эмасми аслида? Туман ҳокими ва бошқа масъуллар ҳам бу борада ҳеч қандай иш қилгани йўқ. Гап одамларнинг ҳаётдан, бугунги яшаётган кунидан розилигидан борар экан, бирорта раҳбарнинг бу борадаги масъулиятсизлигига йўл қўйиб бўлмайди. Зеро, «Обод маҳалла» дастурининг ижроси фақат қоғозда эмас, амалда бажарилиши керак.
Изоҳ (0)