Бухорода ўз дўсти хонадонига ғайриқонуний кириб, унинг хотинини ўлдириш билан қўрқитиб, мол-мулкини талон-тарож қилган босқинчига нисбатан ҳукм ўқилди. Бу ҳақда «Дарё»га Жиноят ишлари бўйича Ромитан туман суди раиси Улуғбек Бозоров маълум қилди.
Иш ҳолатига кўра, судланувчи, қоракўллик фуқаро Ш.Я. қасддан жиноят содир қилган. У «Реги Ҳайдар» маҳалласида яшовчи синфдоши А.Т.нинг «Шер сахий» бозорида савдо билан шуғулланиши ва кундуз куни уйда бўлмаслигини кўчадаги болалардан аниқлаб, режа тузган. Бир жуфт қора рангли ишчи қўлқоп ва бир дона ошхона пичоғи билан қуролланган.
Темир устун (ҳавоза) орқали синфдошининг уйи дарчаси устига чиқиб, хонадонга ғайриқонуний равишда кирган. Хонадонда синфдошининг турмуш ўртоғи З.С. борлигини сезиб қолиб, оқ мато билан ниқобланган ва қўққисдан аёлга ҳужум қилган. Аёлнинг ҳаёти ва соғлиги учун хавфли бўлган зўрлик ишлатиб, ошхона пичоғи билан унинг бел соҳасига ўқталган. Аёлни ўлдириш билан қўрқитиб, унинг елка ва орқа қисмига қасддан тепиб, тан жароҳати етказган, пул ва бошқа қиматбаҳо буюмларни чиқариб беришини талаб қилган.
Куч ва зўравонлик билан баҳоси 200 000 сўм бўлган 1 дона Artel русумли телефонини, аёлнинг қўли ва қулоғида бўлган 1 дона тилла сирғаси ва 1 дона тилла узукни ечиб олган. Бундан ташқари, ётоқхонада жавонидаги 1 дона тилла занжир, 1 дона тилла билакузук, 3 дона тилла узук ва сирғаларни талон-тарож қилиб, жами 6 300 000 сўм моддий зарар етказиб, ҳодиса жойидан яширинган.
Ш.Я.га нисбатан Жиноят Кодексининг 164-моддаси 3-қисми «в» банди (уй-жойга, омборхона ёки бошқа биноларга ғайриқонуний равишда кирган ҳолда босқинчилик қилиш) билан 10 йилга озодликдан маҳрум қилиш жазоси тайинланган.
Изоҳ (0)