Наманган вилоятининг Янгиқўрғон туманидаги 22-мактабда махсус автосинф ташкил этилди. Бу ҳақда туман ҳокимлиги ахборот хизмати маълум қилди.
Синф деворлари йўл ҳаракати қоидаларига оид баннер, плакат ва кўрсаткичлар билан жиҳозланган. Парталар ҳам шунга яраша безатилган.
— Йўл ҳаракати қоидалари бўйича дарслар 1-синфда ва кейинчалик 5-синфдан 11-синфгача ўтилмоқда. Уларда ўзимизнинг тегишли тайёргарликка эга ўқитувчилардан ташқари «Ватанпарвар» ташкилоти ва ЙҲХБ ходимлари ҳам иштирок этиб, ўқувчиларга дастлабки тушунчалардан сабоқ бермоқда. Келгусида мактабимизда автодром ҳам ишга туширилиши режалаштирилган, — дейди мактаб директорининг ўринбосари Ирисбек Ҳайдаров.
Ушбу синф хонаси «Ватанпарвар» ташкилоти туман ўқув, спорт ва техника клуби томонидан жиҳозланиб, ўқувчиларга тақдим этилди. Клуб раҳбари Алижон Тожибоевга кўра, ушбу хона бошқа мактаблар учун андоза вазифасини бажаради ва келгусида уларда ҳам шундай синфлар ташкил этилади.
Эслатиб ўтамиз, олдинроқ Наманганда мактаб ва боғчаларга яқин жойларда сунъий йўл нотекисликлари, таълим муассасаларининг ўзида эса йўл ҳаракати хавфсизлиги майдончалари ташкил этилаётгани маълум қилинганди.
Изоҳ (0)