Тошкент шаҳрида олиб борилган тарғибот ва ташвиқот ишлари натижасида, белгиланган тартибда рўйхатдан ўтган 1815 нафар фуқаронинг 219,7 миллиард сўм қатъий белгиланган солиқ ва молиявий жарима бўйича мавжуд қарзи ҳисобдан чиқарилди. Бу ҳақда Тошкент Давлат солиқ қўмитаси матбуот хизматига асосланиб, «Газета.uz» хабар берди.
Ўзбекистон Президентининг 2018 йил 26 декабрдаги фармонига асосан, Тошкент шаҳар давлат солиқ хизмати органлари томонидан вақтинча фаолият юритмай турган ёки қайта рўйхатдан ўтиб тадбиркорлигини давом эттириш эҳтимоли мавжуд бўлган солиқ тўловчиларнинг солиқ қарзларини ҳисобдан чиқариш чоралари амалга оширилмоқда. Хусусан, жойларга чиққан ҳолда фуқаролар билан учрашиб, уларга фаолиятини қайта тиклаш бўйича тушунтиришлар берилмоқда.
Жумладан, 2012 йилда Учтепа туманида ноозиқ-овқат чакана савдосини йўлга қўйган Алижон Юнусалиев қисқа вақтда ўз ишини тўхтатишга мажбур бўлди. Боиси, 2013 йилда солиқ қонунчилигини бузган тадбиркорга нисбатан 187 миллион сўмдан зиёд молиявий жарима қўлланилган эди.
«Тажрибасизлигим туфайли дастлаб, ишларни тўғри йўлга қўя олмадим. Натижада, бир қатор хатоларга йўл қўйдим ва оқибатда қарзга ботдим. Ўшандан бери, янги иш бошлаш истаги ва қарзларни қандай тўлашим ҳақидаги ўйлар тинчлик бермай юрганди. Солиқ идоралари ходимлари Президентимиз фармони асосида фаолиятимни тикласам, мавжуд қарзларим ҳисобдан чиқарилишини айтишганида тадбиркорликка бўлган иштиёқим янада ошди. Эндиликда, юкларни автомобиль транспортида ташиш фаолияти билан шуғулланиб, тадбиркорликни давом эттириб келяпман, — дейди А.Юнусалиев.
Тошкент ДСБ матбуот хизмати маълумотига кўра, бугунги кунда Учтепа туманидаги 524 нафар фуқаро тадбиркор сифатида фаолиятини тиклади ва уларнинг 39,3 миллиард сўмлик қарзларидан воз кечилган. Олмазор туманида эса турли сабаблар билан молиявий жарима қўлланилган ва фаолиятини тўхтатишга мажбур бўлган 229 нафар тадбиркор ўз фаолиятини қайта тиклаган ва уларнинг 80 миллиард сўмдан зиёд солиқ қарзи ҳисобдан чиқарилган.
ДСБ турли сабабларга кўра молиявий жаримага тортилган фуқароларни жорий йилнинг 1 июлига қадар қарздорликни ҳисобдан чиқариш ва тадбиркорлик фаолиятини тиклашга чақирди.
Изоҳ (0)