2019 йил 26 февралда Бухоро вилояти Олот туман маъмурий судида раис О.Ражабов иштирокида Олот тумани, «Соинқоровул» маҳалла фуқаролар йиғинида яшовчи С.Қодиров, А.Қодиров, Б.Қодиров, Ж.Қодиров ва У.Қодировга (исм-фамилиялар ўзгартирилган) ўз яшаш уйида қимор ва таваккалчиликка асосланган бошқа ўйинлар ташкил қилингани юзасидан суд қарори қабул қилинди. Бу ҳақда «Дарё»га туман маъмурий суди ахборот хизмати маълум қилди.
Маъмурий жавобгарлик тўғрисидаги кодекснинг 191-моддаси 1-қисми билан С.Қодиров, А.Қодиров, Б.Қодиров, Ж.Қодиров ва У.Қодировга (исм-фамилиялар ўзгартирилган) нисбатан тўпланган маъмурий ҳуқуқбузарлик иши кўриб чиқилди.
Ҳуқуқбузарлар С.Қодиров, А.Қодиров, Б.Қодиров Ж.Қодиров ва У.Қодиров 2019 йил 9 февраль куни соат 16:00 ларда Олот тумани, «Соинқоровул» маҳалласидаги С.Қодировнинг яшаш уйида қимор ва таваккалчиликка асосланган бошқа ўйинларда қонунга хилоф равишда иштирок этганликлари аниқланиб, мазкур ҳолатлар ИИБ томонидан тегишли тартибда ҳужжатлаштирилган.
Судда фуқаролар ўз кўрсатмасида айбига иқрорлик билдириб, қонунга хилоф равишда қимор ўйнаганликларини тан олган. Шунингдек, ашёвий далил сифатида ўйинда ишлатилган жами 381 минг сўм пул ва ўйин картасини вақтинча сақлаш мақсадидан олиб қўйганликларини, айбига иқрорлигини, қилмишидан пушаймондалигини, оилавий шароитини инобатга олиб, қонуний енгиллик беришни сўраган.
Ҳуқуқбузарлар С.Қодиров, А.Қодиров, Б.Қодиров, Ж.Қодиров ва У.Қодировнинг ҳаракатлари Маъмурий жавобгарлик тўғрисидаги кодекси 191-моддаси 1-қисми билан тўғри малакаланган. Кодекснинг 245, 309, 310—311-моддаларига амал қилиб, суд қарор қилди.
С.Қодиров, Ж.Қодиров, А.Қодиров, Б.Қодиров Маъмурий жавобгарлик тўғрисидаги кодексининг 191-моддаси 1-қисмида назарда тутилган ҳуқуқбузарликни содир этган деб топилиб, уларга энг кам иш ҳақининг 4 баравари миқдорида (810 920 сўм) жарима, У.Қодировга эса энг кам иш ҳақининг 3 баравари миқдорида (609 190 сўм) жарима солинди.
Ашёвий далил 381 минг сўм пул давлат эгалигига мусодара қилинди.
Изоҳ (0)