Ўзбекистон халқ таълими вазири Шерзод Шерматов мактаб битирувчилари, уларнинг ота-оналари ва педагогларни ўқув йили якунига етгани билан табриклади.
«Бугун республикамиздаги барча мактабларда ‘Сўнгги қўнғироқ’ янграб, 279 минг нафар ўқувчи 11 йиллик таълим тизимига қайта ўтганимиздан кейинги илк битирувчиларга айланади. Уларнинг ҳаётида янги саҳифа очилиб, катта ҳаётга учирма бўлишади», — дейилади вазирнинг Facebook ижтимоий тармоғида эълон қилинган табригида.
Шерзод Шерматов битирувчиларга мурожаат қилар экан, жумладан, шундай деди: «Бугун ҳаётингизда энг қувончли кун. 11 йил мобайнида бир партада ёнма-ён ўтирган, бир оила аъзоларидек бўлиб қолган синфдошларнинг ҳар бири эртадан бошлаб ўзининг шахсий ҳаётини қуришга киришади. Кимдир таҳсилни олий ўқув юртида давом эттирса, яна кимдир ҳалол меҳнати билан оиласига қанот бўлади».
«Қаерда бўлманг, мактаб партасида олган билимларингиз сизга қўл келишига, келгусида уларни янада мустаҳкамлаб боришингизга умид қиламан. Ватанимиз ривожи учун ўз ҳиссангизни қўшишингизга аминман», — дея таъкидлаган вазир.
Шерзод Шерматов Президент Шавкат Мирзиёев бошчилигида халқ таълими тизимида катта ислоҳотлар даври бошланганини, шунингдек, ҳали олдинда бажарилиши лозим бўлган улкан вазифалар кўп эканини қайд этиб ўтган.
Халқ таълими вазирлиги матбуот хизматининг «Газета.uz»га маълум қилишича, 25 май куни вазир ўзи ўқиган Тошкентнинг Олмазор туманидаги 22-мактабда ўқув йили якунланаётганига бағишланган маросимда иштирок этган.
Изоҳ (0)