Ўзбекистонинг Германиядаги элчихонаси ташаббуси билан Берлинда German Water Partnership ташкилотининг 12 йиллик форуми доирасида БМТ раҳнамолигида 2018 йил охирида тузилган Оролбўйи минтақаси учун инсон хавфсизлиги бўйича кўпшериклик траст жамғармасининг тақдимоти ўтказилди.
Форумда Ўзбекистон номидан Қорақалпоғистон Вазирлар Кенгаши раисининг биринчи ўринбосари Жусибек Казбеков бошчилигидаги делегация қатнашган.
Тадбир иштирокчиларига Ўзбекистон ташаббуси ва БМТ кўмагида ташкил этилган Оролбўйи минтақаси учун Инсон хавфсизлиги бўйича кўпшериклик траст фондининг мақсади, вазифалари ва фаолияти тўғрисида батафсил маълумот берилди.
Маълумки, Траст фондининг асосий мақсади Орол денгизини қуришининг экологик ва ижтимоий-иқтисодий оқибатларини юмшатишга йўналтирилган.
Ўз навбатида, German Water Partnership раҳбарияти республикада, хусусан, Оролбўйида сув хўжалиги соҳасини ривожлантириш бўйича Ўзбекистон билан яқиндан ҳамкорлик ўрнатиш истагини билдирди.
Шу муносабат билан, ташкилот раҳбари Ўзбекистонга Германия компанияларини жалб этган ҳолда тегишли лойиҳаларни амалга оширишга тайёр эканлигини маълум қилди.
Тадбирда иштирок этиш доирасида, Ўзбекистон делегацияси, шунингдек, Ташқи ишлар федерал вазирлиги, Иқтисодий ҳамкорлик ва тараққиёт федерал вазирлиги, Экология, табиатни муҳофаза қилиш ва ядро хавфсизлиги федерал вазирили, Германия иқтисодиёти Шарқий қўмитаси вакиллари, German Water Partnership раҳбарияти ва Германиянинг бошқа бир қатор ташкилотлари ва компаниялари билан ҳам икки томонлама музокаралар ўтказди.
German Water Partnership ташкилоти Германия ҳукумати томонидан 2008 йилда тузилган. У сув ресурславрини бошқариш масалалари билан шуғулланадиган 350 дан ортиқ ихтисослаштирилган компаниялар, бирлашмалар ва тадқиқот институтларини ўз ичига олади.
Изоҳ (0)