Бухорода Халқаро «Ипак ва зираворлар» фестивали бошланди (фото)

Бухорода 18-анъанавий Халқаро «Ипак ва зираворлар» фестивали тантаналари бошланди. Бу ҳақда «Дарё» мухбири хабар берди.

Фестивалга Малайзия, Кувайт, Вьетнам, Индонезия, Покистон, Фаластин, Россия, Руминия, Эрон, Хитой, АҚШ, Руминия, Саудия Арабистони, Ҳиндистон каби 50 дан ортиқ давлатдан 2000 нафарга яқин меҳмон келган. Шунингдек, Ўзбекистонда рўйхатдан ўтган дипломатик корпус ва 35 та элчихона вакиллари, 10 дан ортиқ хорижий ОАВ ходимлари ташриф буюрган.

Фестиваль дастуридан туялар карвони, карнай-сурнай садолари, халқ сайллари, фолклор жамоалари бахшиларнинг чиқишлари, миллий либослар фестивали, безакли амалий санъат ва миллий матолар ярмаркаси, кураш мусобақалари ҳамда миллий таомлар тақдимоти каби 30 дан ортиқ лойиҳа ўрин олган.

Халқаро анъанавий «Ипак ва зираворлар» фестивалининг тантанали карвони юриши «Арк» қўрғонидан «Лаби Ҳовуз»га қадар давом этди.